VIKEKE, 29 Setembru 2025 (TATOLI)—Komadante Autoridade Protesaun Sivil (APC-sigla portugeza) Munisípiu Vikeke, Cirílio S. Gomes apela ba populasaun Munisípiu Vikeke tomak atu evita sunu rai arbiru iha tempu bailoro tanba impaktu ba plantasaun sira no afeta ba komunidade nia uma.
“Ita agora tama ona ba mudansa klimátika. Dalaruma udan no dalaruma tempu bailoro. Tanba ne’e, ha’u hakarak apela ba komunidade evita sunu rai. Nune’e mós husu komunidade hadook aan husi fatin risku sira iha tempu udan para akontese dezastre ruma karik labele afetadu,” Komadante APC Munisípiu Vikeke ne’e ba TATOLI iha ninia kna’ar fatin, Sira-Lari, Vikeke, Segunda ne’e.
Cirílio dehan, difísil kombate inséndiu ruma iha área remota tanba daudaun ne’e APC liuhusi Departamentu Bombeiru Munisípiu Vikeke karreta tula bee iha rua, maibé karreta referida la’ós própria atu hamate ahi.
Notísia relevante: APC Vikeke monitoriza materiál rekuperasaun ba vítima dezastre naturál
“Relasiona ho menus transporte operasaun kombate inséndiu, komunidade mak tenke atensaun ba ahi nune’e labele akontese inséndiu. Difikuldade ne’e ami hato’o ona ba nasionál maibé seidauk iha resposta,” nia subliña.
Tuir dadus, hahú fulan-Janeiru to’o fulan-Setembru 2025, APC Munisípiu Vikeke rejista kazu ahi han uma hamutuk unidade 14 kompostu husi Postu Vikeke Vila uma haat (4), Postu Ossu uma haat (4) no Postu Uatulari uma neen (6).
Jornalista: Vitorino Lopez da Costa
Editór: Xisto Freitas da Piedade
