DILI, 29 Setembru 2025 (TATOLI)—Manorin emposadu ensinu báziku primeiru no segundu siklu hamutuk 178, Segunda ne’e, simu ona pose husi Ministru Edukasaun (ME) Interinu, Domingos Lopez Lemos, ba eskola sira iha territóriu.
“Ohin fó pose ba manorin husi bolsa kandidatu tinan 2024 hamutuk na’in-178 molok ba hanorin iha ensinu báziku sira iha territóriu nasionál,” Atuál Sekretáriu Estadu Ensinu Sekundáriu Jerál no Eninsu Tékniku Vokasionál dehan iha salaun INFORDEPE, Balide, Dili.
Govenante ne’e konsidera, loron ohin ne’e momentu importante ba progresu edukasionál iha eskola sira.
“Tomada pose profesór ba karreira dosente ida-ne’e espesiál, ne’ebé reprezenta kapítulu foun ida iha ita-nia vida profisional no avansu promisór ba dezenvolvimentu edukasaun iha ensinu báziku,” Lemos hateten.
Nia hatutan, hanesan profesór iha responsabilidade atu forma ema nia hanoin, inspira ema no outra potensiál ilimitadu husi estudante ida-idak.
“Ita iha responsabilidade atu kria ambiente aprendizajen ida-ne’ebé seguru, inkluzivu no estimulante ho respeitu malu no dezeju ba koñesimentu ida di’akliu no sai boot iha ita-nia estudante sira, tanba bainhira ita tama nu’udár funsionáriu públiku husi edukasaun ida-ne’e, importante tebes atu rekoñese importánsia kolaborasaun nian,” nia tenik.
Sekretáriu Estadu ne’e mós esklarese katak profesór ne’e hetan konfiansa totalmente hosi Ministériu Edukasaun hodi hatán ba eskola hirak-ne’ebé munisípiu sira hasoru liuliu menus profesór.
“Tanba ne’e, ita-boot sira sei koloka no destina atu hanorin ita-nia oan sira no partisipa ativamente iha komunidade eskolár. Maski iha dezafiu, ita kontinua fiar katak edukasaun mak dalan di’ak liubá dezenvolvimentu ita-nia nasaun,” Lopez informa.
Nia fó hanoin katak edukasaun la’ós de’it kona-ba transmite koñesimentu, maibé mós kona-ba inspira labarik sira no foin-sa’e sira atu aprende durante sira-nia moris tomak.
“Ita iha oportunidade atu halo diferensa iha vida estudante idak-idak ne’ebé tama iha ita-nia klase, tanba ne’e ME fiar ita-boot sira sei hala’o kna’ar ho profisionalizmu no dedikasaun másima, atu kria ambiente aprendizajen ida-ne’ebé próperu ba kreximentu no dezenvolvimentu husi ita-nia estudante hotu-hotu,” Domingos akresenta.
Iha fatin hanesan, Diretór Nasionál Rekursu Uumanu Ministériu Edukasaun, João Amaral hatutan ekipa halo xamada ba kandidatu na’in-187 hodi prenxe vaga referida.
“Maibé, husi númeru ne’e, iha kandidatu na’in-sia (9) mak rejeita, nune’e ita iha profesór 178 mak efetivamente ohin loron simu pose,” nia haktuir.
Entretantu, emposadu na’in 178 ne’e, sei koloka ba Munisipiu Aileu na’in-neen (6), Ainaru na’in-sanulu (10), Baukau na’in-13, Bobonaru na’in-15, Kovalima na’in-23 resin, Dili na’in-23 resin, Ermera na’in-16 resin, Lautein na’in-16, Likisá na’in-15, Manatutu na’in-lima (5), Manufahi na’in-11, Oekusi na’in-lima (5) no Vikeke na’in-20.
Jornalista: Osória Marques
Editór: Xisto Freitas da Piedade
