BAUKAU, 30 Setembru 2025 (TATOLI)—Autoridade Munisipál Baukau (AMB) ezekuta ona orsamentu jerál Estadu (OJE) tinan 2025 hamutuk pursentu 70-resin durante trimestrál datoluk (Jullu-Setembru).
Sekretáriu Munisipál Asuntu Administrasaun no Finansa, Juvinal Daniel Filipe Belo esplika ezekusaun orsamentu iha trimestrál datoluk tuir meta tanba finde Setembru atinje pursentu 70-resin ne’ebé maioria halo pagamantu ba Transferénsia Públika ho pursentu 87 korresponde ba orsamentu hamutuk $6.095.361,20 husi totál alokasaun orsamentu $7.012.730,00.
“Ita-nia ezekusaun tuir meta tanba aloka ba saláriu no vensimentu inklui despaxu sira bazeia ba pedidu hotu nune’e ita atinje liu pursentu 75,” Sekretáriu Munisipál Asuntu Administrasaun no Finansa Baukau informa ba TATOLI liuhosi telefónema, Tersa ne’e.
Juvinal Belo relata ezekusaun ba Saláriu no Vensimentu atinje pursentu 70 korresponde ba orsamentu 1.964.945,13, ho alokasaun orsamentu hamutuk $2.812.445, Kapitál Dezenvolvimentu ezekuta ona pursentu 25, korresponde ba $349.620,40 husi totál alokasaun hamutuk $1.407.212,00.
Aleinde ne’e, gastu ba Kapitál Menór hamutuk $ 3.150,00 atinje pursentu 1 ho alokasaun orsamentu $446.800,00 no Bens no Serbisu ezekuta pursentu 1 ho totál alokasaun orsamentu hamutuk $$ 758.560.
Tuir dadus, totál saldu hamutuk $ $ 2.499.707,87 ne’ebé sei ezekuta ba trimestrál ikus hanesan gastu ba Saláriu no Vensimentu $847.499,86, Bens no Serbisu $697.854,25, Transferénsia Públiku $819.593,30, Kapitál Menór sei ezekuta hamutuk $12.315,00 no Kapitál Dezenvolvimentu sei ezekuta orsamentu iha trimestrál ikus hamutuk $122.445,47.
“Bazeia ba ita-nia saldu, bainhira trimestrál ikus halo tan pagamantu Saláriu no Vensimentu no Kapitál Dezenvolvimentu hodi halo pagamantu ba retensaun projetu sira entaun ramata tinan ne’e ita bele atinje meta ezekusaun,” Juvinal argumenta.
Autoridade Baucau ba tinan 2025 hetan alokasaun orsamentu hamutuk $12.437.747,00 fahe ba kategória haat hanesan Saláriu no Vensimentu $2.812.445, Bens no Serbisu $758.560, Transferénsia Públiku $7.012,730,00, Kapitál Menór $446.800,00 no Kapitál Dezenvolvimentu hamutuk $1.407.212,00.
Entretantu, tuir dadus husi Portál Transparénsia Ministériu Finansa, iha loron-Tersa (30/09/2025) ne’ebé TATOLI asesu, totál ezekusaun orsamentu Munisípiu Baukau ba trimestrál datoluk atinje pursentu 79,8 kompostu husi Kompromisu $513.819,30, Obrigasaun $1.003.499,53, Atuál $8.922.225,20 no saldu hamutuk $1.998.202,97.
Jornalista: Natalino Belo
Editór: Xisto Freitas da Piedade
