DILI, 30 Setembru 2025 (TATOLI)-Ministru Interior, Francisco da Costa Guterres, fó orienta ona ba Komandante Jerál Polisia Nasionál Timor-Leste (PNTL) atu mantein fó autorizasaun ba membru Korpu Seguransa Pesoál (CSP, sigla portugés) hodi halo seguransa (Vijilánsia) ba eis titulár tanba Governu seidauk foti desizaun atu hapara seguransa.
“Ami ko’alia tiha ona katak hein lai to’o Governu foti desizaun, maibé Governu seidauk foti desizaun atu hapara vijilánsia ba eis titular sira tanba iha lei ne’e dehan katak fó fulan ida ba Governu halo tranzisaun hodi prepara kondisaun,” Ministru Francisco Guterres, ko’alia iha Palásiu Governu, ohin.
Tanba ne’e mak nia informa tiha ona ba Komandante Jerál Polísia Nasionál Timor-Leste katak mantein lai polísia sira hodi fó seguransa ba eis titulár sira-ne’e hein to’o desizaun Governu foti desizaun.
“Aleinde ne’e ita mós tenke haree eis titulár ne’e sé, ema sira uluk luta ba rai ida-ne’e, mate ba rai ida-ne’e, sira-ne’e mak uluk hamriik iha ita-nia oin, lori rai ne’e ba ukun an tiha, ita mós tenke konsidera sira-nia luta ida-ne’e”, nia esplika.
Entanun nia indika eis titulár ne’e maka hanesan; Mari Alkatiri, Francisco Guterres Lú-Olo no Taura Matan Ruak, tamba eis titulár sira-ne’e uluk iha ai-laran hotu fo an ba mate tan rai ida-ne’e.
“Agora tanba de’it lei ne’e ita dada sira ne’e, lae, ne’ebé lei ne’e fó hela loron 30, entaun prontu sira sei hein desizaun maibé agora mantein nafatin lai halo vijilánsia ba eis titulár na’in-tolu ne’e.
Notísia relevante: Ministra Finansa : Verba ba eis titulár sei kontein iha proposta OJE 2026
Jornalista: Alexandra da Costa
Editór: Cancio Ximenes
