BOBONARU, 02 Outubru 2025 (TATOLI) –Autoridade Munisípiu Bobonaru realiza enkontru hodi forma komisaun organizadora hodi prepara ba komemorasaun Loron Mundiál ba Ai-han ho tema nasionál “Nutrisaun Seguransa Ai-han fundasaun ba futuru ne’ebé di’ak”.
Prezidente Komisaun Organizadora, atuál Diretór Seguransan Alimentár, Rui Manuel Lasi, dehan selebrasaun Loron Mundiál ba Ai-han iha tinan ne’e sei realiza iha Jináziu Maliana iha 16 Outubru ho atividade kompetisaun kulinária ba ai-han lokál, sertame ba estudante sira kona-ba fornesimentu ai-han merenda eskolar ho kualidade.
Aleinde ne’e, organiza semináriu jerál ba grupu agrikultór no konvida mós establesimentu komersiál sira ne’ebé fa’an produtu importadu no ajente ekonomíku sira iha merkadu Maliana.
“Ida ne’e atu haree mós nia durasaun, dalaruma sasán ne’e liu ona prazu mós sira sei fa’an. Entaun, liuhusi semináriu ne’e fó informasaun ba sira, depois ita atu motiva sira katak ai-han ne’ebé sira fa’an tenke fresku no kualidade di’ak”, nia hateten iha edifísiu Administrasaun Munisipál Bobonaru.
Iha sorin seluk, Sekretáriu Autoridade Munisípiu Bobonaru ba Asuntu Sosiál, Júlio Carvalho Caero, husu ba komisaun organizadora atu serbisu ho sólidu hodi fó susesu ba komemorasaun loron mundiál ne’e.
“Loron ne’e importante mai ita atu fó hanoin no hasa’e ita-nia konxiénsia katak han ai-han ruma tenke moos no saudavel mai ita, liuliu ita-nia oan sira-nia nutrisaun”, dehan.
Sorumutu ne’e komisaun organizadora mós forma ekipa júri ba atividade kompetisaun kulinária no sertame.
Jornalista: Sergio da Cruz
Editora: Maria Auxiliadora
