KOVALIMA,08 Outubro 2025 (TATOLI)- Jogadór husi modalidade futeból munisípiu Bobonaru kuarta ne’e, tenke derrota 0-1 bainhira joga hasoru ekipa jogadór husi RAEOA iha jogu fronteira CUP 2025 ne’ebé maka hala’o iha Kampu Futeból Salele.
Ekipa jogadór husi Bobonaro tenke lakon ho RAEOA bainhira jogadór Natalino Lalisuk hosi ekipa RAEOA marka golu ida ba guarda redi ekipa Bobonaro nian iha minutu 30 iha primeira volta.
“Ami-nia jogadór desportu husi modalidade futeból RAEOA hasoru Bobonaru kuaze jogu ho di’ak, maibé hasoru difikuldade kampu ladun di’ak jogadór sira atu jogu,” Treinadór futeból RAEOA, Agostino da Costa, informa ba jornalista sira hafoin finaliza jogu iha kampu Salele.
Ho rezultadu provizóriu ne’e, treinadór RAEOA ne’e otimista sei lori ekipa RAEOA tama faze finál kompetisaun jogu futeból fronteira CUP 2025 iha Kovalima.
“Ha’u hanesan treinadór sei esforsu hodi enkoraja hodi bele treinu tan jogadór sira bele tama iha jogu finál iha eventu jogu fronteira cup ne’ebe maka hala’o iha munisipiu Kovalima,”nia promote.
Entertantu, jogu fronteira CUP 2025 iha Kovalima hahú ona iha loron 8 no sei termina iha loron 11 fulan Outubru ho modalidade futeból, voleiból, maratona, basketból, kurrida kavalo.
Jornalista:Celestina Teles
Editór :Florencio Miranda Ximenes
