PNDS aloka orsamentu adisionál $53.400 ba Suku Dilór implementa investimentu haki’ak fahi

VIKEKE, 01 Outubru 2025 (TATOLI)—Diretór Programa Nasionál Dezenvolvimentu Suku (PNDS) Munisípiu Vikeke, Francisco Soares Varela informa orsamentu adisionál ba Munisípiu Vikeke tinan 2025 hamutuk $53.400.00 aloka ona ba konta Suku Dilór, Postu Administrativu Lakluta hodi implementa investimentu haki’ak fahi.
“Iha tinan ida-ne’e, Munisípiu Vikeke hetan projetu orsamentu adisionál husi PNDS ne’ebé sei implementa iha Suku Dilór, Postu Vikeke Vila. Orsamentu adisionál ne’e ita foka liubá planu investimentu haki’ak fahi ne’ebé sei implementa iha Suku Dilór. Fatin ami identifika ona no orsamentu iha semana kotuk aloka ona ba konta bankária Suku Dilór hamutuk $53.400.00,” Francisco Soares Varela ba TATOLI iha Postu Vikeke Vila, Kuarta ne’e.
Francisco dehan maski orsamentu adisionál PNDS aloka ona ba Suku Dilór, maibé seidauk implementa tanba sei hein prosesu aprovizionamentu no bainhira prosesu aprovizionamentu hotu ona hafoin implementa konstrusaun fatin ba fahi luhan sira.
“Kona-ba preparasaun ba investimentu haki’ak fahi ne’ebé Governu sentrál fó fiar mai Vikeke, inísiu ami enkontru ho autoridade sira no halo identifikasaun rai ba implementasaun haki’ak fahi ne’e kuaze ektare tolu iha área Akadiruhun, Suku Dilór no autoridade Dilór no komunidade prontu hodi implementa planu investimentu referidu,” Francisco informa.
Nia esplika planu investimentu haki’ak fahi di’ak tanba ba futuru bele fornese naan fahi ba komunidade Vikeke no habelar fini fahi ba komunidade ne’ebé mak interese haki’ak fahi no sei benefísia membru grupu ne’ebé envolve iha grupu ida-ne’e.
Grupu haki’ak fahi iha Suku Dilór iha membru hamutuk na’in-15 kompostu husi Xefe Suku Dilór hanesan koordenadór grupu no membru maihusi kada aldeia sira iha Suku Dilór.
Jornalista: Vitorino Lopez da Costa
Editór: Xisto Freitas da Piedade

