Governu aprova akordu finansiamentu ho Banku Mundiál millaun $30 ba projetu abastesimentu bee-moos iha Baukau Villa

DILI, 16 Novembru 2026 (TATOLI)—Governu aprova akordu finansiamentu entre Governu ho Banku Mundiál liuhusi Asosiasaun Internasionál ba Dezenvolvimentu (IDA), atu finansia projetu abastesimentu bee-moos ba papitál Munisípiu Baukau ho montante millaun $30.
Proposta ne’e aprezenta hosi Vise-Ministra Finansa, Regina de Jesus, iha reuniaun Konsellu Ministru estraordináriu ne’ebé hala’o iha Palásiu Governu, kuarta ne’e.
Iha aprezentasaun ne’e Vise-Ministra Finansa, Regina de Jesus esplika katak objetivu prinsipál projetu ne’e nian mak atu hadi’a asesu ba bee-moos ne’ebé seguru ba populasaun Baukau.
“Liuhusi konstrusaun no reabilitasaun ba infraestrutura fornesimentu bee-moos iha kapitál munisípiu nomós iha área priurbana (ne’ebé besik sidade) sira-ne’ebé selesiona ona,” Ministra ne’e relata durante iha reuniaun Konsellu Ministru, ohin.
Ministra hein katak, iha tinan 2031, maizumenus ema rihun 37 sei hetan benefísiu husi abastesimentu bee ida-ne’ebé kontinua no ho kualidade, liuhusi instalasaun ka reabilitasaun husi ligasaun doméstika sira maizumenus 5700 ne’ebé kobre mós eskola 15.
Tuir sira-nia intervensaun, sira planeia ona inklui reabilitasaun no protesaun ba bee-matan sira ne’ebé eziste, konstrusaun ba estrutura foun sira ba kaptasaun, estasaun bombajen no tratamentu nian, rezervatóriu armazenamentu nian, no mós rede distribuisaun sira.
“Projetu ne’e inklui mós medida sira atu hadi’a efisiénsia no sustentabilidade sistema nian, hamenus bee ne’ebé lakon, no hametin kapasidade atu responde ba tempu bailoron nian no fenómenu klimátiku sira seluk ne’ebé estremu,” governante ne’e subliña.
Nia hatutan, finansiamentu ne’e inklui mós asisténsia téknika no hasa’e kapasidade ba empreza públika Bee Timor-Leste (BTL), ne’ebé responsavel ba operasaun no manutensaun infraestrutura nian hafoin ramata obra sira.
“Ezekusaun projetu ne’e responsabilidade Ministériu Obra Públika nian, ho supervizaun husi Konsellu Administrasaun Fundu Infraestrutura nian,” nia hateten.
Enkuantu, empréstimu ne’e fó ho kondisaun konsesionál ho períodu reembolsu tinan 40, inklui períodu karénsia tinan 10, no taxa servisu anuál 0,75% ba montante sira-ne’ebé utiliza.
Ho investimentu ida-ne’e, Governu hanoin atu hadi’a kondisaun moris no saúde populasaun Baucau nian, garante fornesimentu bee ne’ebé konfiavel no sustentável liu, no mós kontribui ba dezenvolvimentu ekonómiku no sosiál munisípiu nian.
Jornalista : Alexandra da Costa
Editór : Cancio Ximenes

