KM aprova millaun $6-resin ba pagamentu kréditu subsídiu alojamentu ba rekursu umanu AM

DILI, 16 Novembru 2026 (TATOLI)—Reuniaun Konsellu Ministru, segudna ne’e, aprova projetu Rezolusaun Governu ne’ebé aprezenta husi Ministru Administrasaun Estatál, Tomás do Rosário Cabral, kona-ba pagamentu kréditu sira-ne’ebé liu tiha ona no ne’ebé seidauk selu relasiona ho subsídiu alojamentu ba Rekursu Umanu Autoridade Munisipál (AM) sira-nian.
Rezolusaun ne’e determina pagamentu ba montante sira-ne’ebé deve ba funsionáriu públiku sira-ne’ebé iha direitu ba subsídiu ba hela-fatin maibé la simu durante períodu ne’ebé subsídiu ne’e vigora.
Subsídiu ida-ne’e, ne’ebé korresponde ba 50% husi benefisiáriu sira nia saláriu baze mensál, kria iha 2023 hodi insentiva transferénsia funsionáriu públiku sira husi Administrasaun Sentrál ba Administrasaun Lokál, iha ámbitu prosesu desentralizasaun administrativa nian, no halakon iha fulan-Outubru 2025.
Ida-ne’e atu regulariza pagamentu sira-ne’ebé liu ona prazu, Governu autoriza despeza másimu $6.670.529,50, no Ministériu Finansa, Komisaun Funsaun Públika, nomós Ministériu Administrasaun Estatál responsável atu garante prosedimentu ne’ebé presiza, inklui pagamentu diretu ba benefisiáriu sira-nia konta bankária.
Jornalista : Alexandra da Costa
Editór : Cancio Ximenes

