Top

Governu aprova millaun $14.33 hodi konstrui sub-estasaun elétrika iha Aileu-Ermera

Sentrál Elétrika Hera. Imajen/Espesiál

DILI, 16 Novembru 2026 (TATOLI)—Governu liuhusi reuniaun Konsellu Ministru delibera hodi autoriza despeza abertura ba prosedimentu aprovizionamentu liuhusi konkursu públiku, ba konstrusaun sub-estasaun elétrika foun rua iha Aileu no Ermera.

Proposta ne’e aprezenta direta husi Ministru Obra Públika, Sanuel Marçal, kona-ba projetu konstrusaun sub-estasaun elétrika no mós rede ligasaun korrespondente 150 kV/20 kV, ho montante globál másimu estimadu millaun $14.33.

Ministru Obra Públika, Samuel Marçal, hateten ohin sira aprezenta proposta ida hodi husu autorizasaun Konsellu Ministru nian atu hahú despeza ba prosesu konkusru públiku ba sub-estasaun rua mak iha Aileu no Ermera.

“inisiativa ida-ne’e atu redús ahi labele mate beibeik iha parte Ermera ho Aileu ninian, tanba durante ne’e liña eletrifikasaun dada husi Kamea-Dili mak ba to’o iha Aileu inklui Kailaku,” Ministru Obra Públika, Samuel Marçal, hateten, informa ba jornalista sira iha Palásiu Governu, ohin.

Dalaruma, nia dehan, akontesimentu ai monu kona liña eletrifikasaun sira iha Kailaku, Ermera no Aileu, entaun Ninia impaktu mellora to’o iha Dili. Tanba ne’e mak ohin sira aprezenta proposta iha KM atu tinan oin bele iha prosesu konstrusaun.

Nia hatutan husi montante ida-ne’e, maizumenus millaun $26.65 aloka ba konstrusaun sub-estasaun no ninia rede ligasaun sira iha Aileu, no millaun $14,68 ba konstrusaun infraestrutura korrespondente iha Ermera.

Projetu ne’e ho objetivu atu hadi’a rede transmisaun enerjia elétrika, hametin estabilidade no kualidade fornesimentu ba populasaun nomós hamenus posibilidade ba interrupsaun eletrisidade (ahi mate) liuliu munisípiu sira-ne’ebé iha foho sira.

Jornalista : Alexandra da Costa

Editór        : Cancio Ximenes

Publisidade

Leave a Reply

Latest Post

error: Content is protected !!