DILI, 08 Outobru 2025 (TATOLI)—Primeiru-Ministru, Kay Rala Xanana Gusmão, kuarta ne’e, prezide reuniauan Konsellu ministru hodi aptova proposta formasaun ba karáter ba funsionáriu públiku sira, ne’ebé aprezenta husi Prezidénsia Konsellu Ministru, Agio Pereira no akompaaa husi Komisaun Funsaun Públika (CFP, sigla portugés).
Sekretáriu Estadu Komunikasaun Sosiál, Expedito Loro Dias Ximenes, hateten iha reuniaun Konsellu Ministru mós ohin rona aprezentasaun hodi define sai rezolusaun ida kona-ba formasaun karáterter funsionáriu públiku nian hanesan formasaun lideransa ba funsionáriu sira iha Timor laran tomak.
“Nune’e, rezolusaun ida-ne’e atu fó kompeténsia ba Komisaun Funsaun Públika hodi hala’o ninia kna’ar importante liuliu oinsá fó formasaun karáter no lideransa ba funsionáriu públiku sira hotu,” Sekretáriu Estadu Komunikasaun Sosiál ne’e informa ba jornalista sira iha nia kna’ar fatin, Palásiu Governu, ohin.
Bazeia ba dokumentu ofisiál neʼebé Agênsia Tatoli asesu iha portál Governu, defina katak rezolusaun Governu ida-ne’e ho objetivu atu hametin étika, dixiplina, lideransa no sentidu servisu públiku funsionáriu públiku hotu-hotu nian, hodi nune’e bele promove Administrasaun Públika ida-ne’ebé ho integridade, efisiénsia no kompromisu boot-liu ba valór sira Estadu nian.
Nune’e, medida ne’e nu’udar parte husi reforma neʼebé la’o daudaun iha jestaun no dezenvolvimentu rekursu umanu neʼebé prevee ona iha Programa Governu Konstitusionál da-sia (IX) nian, ne’ebé destaka importánsia formasaun nian nu’udar instrumentu esensiál atu hametin lideransa, transparénsia no responsabilizasau iha setór públiku.
Tanba ne’e, formasaun ne’e kontínua no sei kobre komponente karáterr, ierarkia no dixiplina, sidadania, patriotizmu no nasionalizmu nian, hodi haburas kultura respeitu institusionál, kumprimentu ba norma legál sira nomós valorizasaun ba kna’ar funsionáriu públiku nian iha konstrusaun Estadu no dezenvolvimentu nasionál.
Aleinde ne’e, sei inklui mós modulus kona-ba abilidade profisionál sira hanesan jestaun efisiente, serbisu iha ekipa no rezolve dezafiu no konflitu sira iha servisu públiku, no mós área relevante sira seluk.
Entretantu, Komisaun Funsaun Públika sei responsabiliza ba koordenasaun dezenvolvimentu kurríkulu no servisu hamutuk ho instituisaun relevante sira hodi determina fatin no kondisaun ba realizasaun formasaun.
Partisipasaun husi funsionáriu sira iha atividade sira-ne’e nu’udar komplementu obrigatóriu ida ba rejime formasaun no dezenvolvimentu profisionál neʼebé daudaun ne’e vigora.
Jornalista : Alexandra da Costa
Editór : Cancio Ximenes
