DILI, 08 2025 (TATOLI)- Ministru Interiór Francisco da Costa Guterres, hateten, prosesu rekrutamentu membru PNTL foun sei la’o ho transparante tanba entidade oinoin mak hola parte iha sekretariadu komisaun rekrutamentu.
Nia esplika, Sekretariu Komisaun rekrutamentu ne’ebé instala iha Sentru Formasaun Polísia Komoro ne’e envolve husi reprezenta Prezidensia Repúblika na’in ida, Parlamentu Nasionál na’in- rua, deputadu ida husi bankada Governu no bakada opozisaun, reprezentante NGO na’in-ida no pesoál Ministeriu Interiór na’in-rua.
“Sira-ne’e atu hola parte iha komisaun rekrutamentu ne’e hodi halo avaliasaun no supervizaun ba prosesu rekrutamentu ba membru PNTL foun ne’ebé mak oras ne’e la’o hela,” Francisco Guterres hateten ba jornalista sira hafoin partisipa reuniaun Konsellu Ministru, iha Palásiu Governu, kuarta.
Tanba ne’e, Governante ne’e garante katak prosesu rekrutamentu ba membru PNTL foun sei la’o transparante no la’o ho susesu.
“Ha’u garante katak rekrutamentu ne’e sei la’o ho transparante no sei la hamosu buat ruma, tanba ema ne’ebé mak hola parte komisaun rekrutamentu ne’e reprezentante Prezidénsia Repúblika mós iha, Parlamentu mós iha ne’ebá, ne’ebé ha’u fiar rekrutamentu ne’e sei la’o loos,” nia katak.
Jornalista: Natalino Costa
Editór : Evaristo Soares Martins
