DILI, 08 Outobru 2025 (TATOLI)—Timor-Leste sei selebra loron Balibo Five ba da-50 no loron nasionál Liberdade Imprensa iha Suku Balibo Villa, Postu Administrativu Balibo, Munisípiu Bobonaru, hahú husi 13-16 Outobru 2025 ho tema “Liberdade imprensa ba lia-loos no justisa”.
Notísia Relevante: CI propoin ba Ramos-Horta kondekora jornalista na’in-lima mate iha Balibo
Diretór Ezekutivu Konsellu Imprensa (CI, sigla portugés), António Dias, hateten CI kria Komisaun Konjuntu ne’ebé hamutuk ho Sekretária Estadu Komunikasaun Sosiál (SEKOMS) hodi realiza eventu ba loron liberdade imprensa no Balibo Five.
“Ami mós servisu hamutuk ho Ministériu Komérsiu Indústria (MCI) no Ministéria Juventude Desportu Arte no Kultura (MJDAK) tanba programa ne’ebé destaka iha eventu ne’e sei iha mós programa desportiva inklui feira ba produtu lokál sira,” Diretór Ezekutivu Konsellu Imprensa (CI, sigla portugés), António Dias, informa ba Agencia Tatoli iha nia kna’ar fatin, Kintal-Boot, tersa ne’e.
Atividade feira nian ne’e, CI servisu hamutuk ho Ministériu Komérsiu Indústria (MCI) no rejista ona partisipante hamutuk na’in-20, maibé bele iha posibilidade liu tanba tinan ne’e sira halo mobilizasaun hamutuk ho Ministériu Komérsiu.
“Ba eventu iha tinan ida-ne’e, osan ne’ebé prevee husi Konsellu Imprensa hamutuk rihun $30-resin, maibé sei iha apoiu husi parséria ministériu relevante sira. Ita iha programa sira-ne’ebé prepara hanesan baibain kada tinan selebra ne’e, no programa topu (puncak) liu ne’e ita halo ho atribuisaun prémiu kategória neen ba produtu jornalítiku nian,” nia relata.
Iha tinan ida-ne’e, CI iha tan kagória foun ida mak “The best of the years Balibo Five”, no agora sira halo hela koordenasaun ho Prezidente Repúblika atu halo kondekorasaun ba jornalista na’in-lima ne’ebé seidauk hetan kondekorasaun hamutuk ho jornalista timoroan sira, maske iha jornalista balu mak simu ona kondekorasaun.
“Kuazé iha atividade barak mak sei halo hanesan reflesaun nasionál ho objetivu atu halo jornalista sira hanoin uitoan paisajen husi trajédia tinan 50 nian no legadu importante saida mak jornalista no mídia-na’in sira bele hetan ba futuru hamutuk ho plataforma ne’ebé daudaun ne’e ita iha,” nia dehan.
Nia esplika, iha atividade reflesaun nian ne’e CI sei konvida ativista mídia sira-ne’ebé servisu durante tempu rezisténsia nian hodi fahe esperiénsia ba jornalista sira inklui estudante sekundária sira-ne’ebé iha mehi atu sai jornalista iha futuru.
Programa ne’ebé Konsellu Imprensa sei destaka iha loron “Balibo Five” mak hanesan, misa agradesimentu hotu sei sunu lilin, SEKOMS sei kontribui ho fahe filmajen balun ba suku ne’ebé sira identifika ona, Atividade “meet the press”, Lansamentu radiu komunidade Fronteira Balibo.
Atividade seluk tan mak atu halo asaun solidariedade sosiál ba komunidade, Feira ba produtu jornalístiku no produtu lokál husi komunidade sira, atribuisaun prémiu ba jogadór sira, atividade tentativa seluk mak lansamentu ba avenida Liberdade Imprensa.
Tuir nia, mídia nasionál ne’ebé sei lori mak Rádiu Televizaun Timor-Lorosa’e (RTTL, E.P) no Agência Tatoli (TATOLI, I.P), maibé mós iha mídia sira seluk ne’ebé sei ba hotu tanba CI labele bolu de’it balun, se lae mosu dezintendimentu.
Aleinde ne’e, nia hatutan, serimónia ne’e sei partisipa husi entidade Governu, mídia balun husi Indonézia no Autrália, orgaun diplomásia sira, ajente relevante balun inklui autoridade lokál no komunidade.
Tuir informasaun, jornalista sira ne’ebé atu tuir programa konferénsia ne’ebé Konsellu Imprensa prepara sei hahú mobiliza iha loron 14 to’o 15 fulan-Outobru, enkuantu ba mídia sira-ne’ebé atu ba halo sira-nia servisu kobertura ne’e buat ketak ida, depende ba sira-nia redasaun tanba iha loron 13 Outobru ne’e abertura inisiál ba eventu Balibo Five nian.
Notísia Relevante: Jornalista na’in-10 submete dokumentu ba kompetisaun prémiu “Balibo Five”
Jornalista : Alexandra da Costa
Editór : Cancio Ximenes
