Top

CI propoin ba Ramos-Horta kondekora jornalista na’in-lima mate iha Balibo

Balibo Five. Imajen/Espesial

DILI, 22 Setembru 2025 (TATOLI)–Prezidente Konsellu Imprensa Timor-Leste (CI-sigla portugés), António M. da C. Moniz Mali ho estrutura hasoru malu ho Prezidente Repúblika, José Ramos-Horta hodi propoin ba Xefe Estadu atu kondekora jornalista hirak ne’ebé mate durante luta ba libertasaun nasionál liuliu ba jornalista na’in-lima ne’ebé mate iha Balibo.

Notísia Relevante: Balibo Five, “Tim Susi” sunu jornalista na’in-lima to’o mutuk

“Ami propoin ba ita-nia Prezidente Repúblika atu fó kondekorasaun ba ita-nia jornalista sira ne’ebé mate ba luta independensia nian bainhira sira halo kobertura mak mate, liuliu ba jornalista na’in-lima (5) husi Australia ne’ebé mate iha Balibo ne’e,” Prezidente ne’e hateten ba jornalista sira hafoin remata enkontru ho Xefe Estadu Palásiu Prezidensiál NIcolau Lobato, Bairru Pite, ohin.

Nia dehan, tuir lista ne’ebé CI prepara ona jornalista hamutuk na’in-sia (9) mak sei hetan kondekorasaun.

“Jornalista sira kuaze na’n-sia (9) hanesan ne’e, sira mak ami propoin ona ba ita-nia Prezidente Repúblika, sira-ne’e balun estranjeiru no balu timoroan. Konserteza ba jornalista na’in-lima (5) mate iha Balibo no inklui balun ne’ebé mate iha Dili no fatin seluk tan,” nia dehan.

Tanba ne’e, Prezidente Repúblika konfirma kondekorasaun sei prepara hela liuhusi kondisaun legál antes atribui kondekorasaun referidu.

“Kondekorasaun ne’e ita hakarak Prezidente atribui ba tinan 50 Balibo Five, ne’ebé mak ita sei komemora iha Balibo. Ita mós konvida ona Prezidente Repúblika atu partisipa hodi fó kondekorasaun ba jornalista na’in-sia (9) ne’ebé ami haruka ona naran ba Prezidente. Entaun, Prezidente nia ekipa sei prepara hela kondisaun legál sira atu nune’e iha loron 16 fulan-Outubru, Prezidente bele atribui kondekorasaun,” nia dehan.

Atividade sira durante komemora tinan 50 Balibo Five

Alende ne’e, Prezidente Komisaun organizadora ba Komemorasaun tinan 50 Balibo Five, no loron liberdade imprensa, António Dias, hateten iha komemorasaun ne’e sei iha eventu boot lubuk ida mak sei realiza iha Balibo.

“Komemorasaun tinan 50 Balibo Five ho nia tema sentrál mak: ‘Liberdade Imprensa ba Lia-loos no Justisa no Komemorasaun trazedia Balibo’. Atividade ne’ebé ita sei hala’o mak hanesan, iha loron 15 Outubru, ita-sei konvida ita-nia Primeiru-Ministru atu halo reflesaun hamutuk ho ita-nia jornalista sira, Asosiasaun Jornalista sira no Mídia-na’in sira atu haree hamutuk istória tinan 50 ne’ebé ita haka’at liu ona, oinsa ita haka’at fali ba tinan 50 oin mai,” nia relata.

Iha parte seluk, CI sei realiza mós atividade feira liuhusi produtu jornalista sira-nian, hanesan foto jornalístiku ne’ebé abertura iha loron 14 fulan-Outubru, nune’e sei iha lansamentu ba avenida Liberdade Imprensa iha loron 15 fulan-Outubru.

Nune’e, sei iha mós lansamentu ba Radiu Liberdade hanesan Radiu Komunidade Balibo no sei lansa mós feira ba produtu lokál ne’ebé CI sei servisu hamutuk ho Ministériu Komersiu Industria (MCI-sigla portugés).

“Ita iha atividade lubuk ida, feira produtu lokál ita hasoru ona MCI, sira ptrontu atu apoiu ita. La’ós ne’e de’it, ita sei iha mós atividade desportiva balun, atividade sira hotu atu ita agradese ba jornalista sira hotu ne’ebé fó ona sira-nia vida ba ita-nia ukun aan ida ne’e liuliu ba sira-ne’ebé estranjeiru bele husik hela sira nia nasaun bele mai mate iha ita-nia rai tanba lia-loos,” nia dehan.

Jornalista : Hortencio Sanchez

Editór       : Cancio Ximenes

Publisidade

Leave a Reply

Latest Post

error: Content is protected !!