DILI, 13 Outubru 2025 (TATOLI)— Deputadu Bankada Partidu Demokrátiku (PD), Armando dos Santos Lopes informa, aldeia lima iha Postu Administrativu Luru, Munisípiu Lautein seidauk asesu ba liña eletrisidade dezde uluk to’o agora.
“Ha’u husu ba Governu liuliu Eletricidade de Timor-Leste (EDTL) tenke tau-matan ba ita-nia populasaun sira área rurál ne’ebé to’o agora seidauk asesu liña eletrisidade,” Deputadu Armando dos Santos Lopes hateten liuhusi sesaun plenária, Segunda ne’e.
Aldeia lima ne’e mak hanesan Ailari, Abere, pailofur iha Suku Luru no Aldeia Luturu no Lutu iha Suku Wairoku, Postu Administrativu Luru.
Notísia relevante : EDTL, E.P selebra kontratu ho empreza manan-na’in 17 projetu eletrifikasaun nasionál
Aleinde ne’e, aldeia Sorubaku, Suku Maina I, Postu Administrativu Lautein, Munisípiu Lautein, dezde 2023 empreza harii hotu ona ai-rin no kanaliza hotu ona fiu, hein de’it atu konekta enerjia eletrisidade maibé to’o agora seidauk realiza.
“Ida-ne’e ha’u hanoin Governu tenke tau-atensaun tanba ita-nia povu iha área rurál presiza liña eletrisidade,” nia akresenta.
Hatán ba kestaun ne’e, Vise-Ministru Asuntu Parlamentár, Aderito Hugo hateten, nia parte sei enkamiña preokupasaun ne’e ba EDTL.
“Ha’u sei hato’o ba EDTL, karik polítika eletrifikasaun seidauk to’o ba populasaun hothotu, ida-ne’e responsabilidade EDTL,E.P. Maibé ha’u hakarak adianta katak liña eletrisidade ba populasaun sira iha territóriu, suku sira asesu hotu ona, falta de’it mak aldeia,” nia katak.
Governante ne’e dehan, mandatu IX Governu tinan ne’e to’o tinan oin hakarak akaba ona ho restu aldeia sira ne’ebé posibilidade bele halo koneksaun liña eletrisidade
Jornalista : Arminda Fonseca
Editora : Julia Chatarina
