BOBONARu, 16 outubru 2025 (TATOLI)-Prezidente Konsellu Imprensa Timor-Leste (CITL), António Cesar Mali, fó respeitu kle’an ba jornalista australianu na’in-lima ne’ebé mate iha trajédia Balibo tinan-50 liubá, iha komemorasaun ne’ebé hala’o iha Balibo House.
Akontesimentu ne’e, Cesar dehan, hanoin la’ós de’it nu’udar trajédia ida, maibé mós nu’udar marku signifikativu iha luta ba liberdade imprensa iha Timor-Leste.
“Ohin, ita komemora aniversáriu trajédia Balibo ba dala-50 eventu ida-ne’ebé hamate joven jornalista na’in-lima ne’ebé mai iha ne’e simplesmente atu hateten lia-loos. Sira-nia korajen no sakrifísiu fó hanoin mai ita katak buka lia-loos nunka saugati de’it,” Cesar Mali hateten iha ninia diskursu
Komemorasaun tinan ne’e koinside ho Loron Nasionál Liberdade Imprensa Timor-Leste nian, subliña importánsia jornalizmu nian hodi harii demokrasia no salvaguarda públiku nia lian.
Cesar Mali hato’o ninia apresiasaun ba jornalista Timor-Leste tomak ba sira-nia dedikasaun hodi hala’o sira-nia profisaun ho integridade, iha dezafiu sira-nia leet ne’ebé imprensa nasionál hasoru nafatin.
“Husi konflitu nia ruin sira to’o promesa dame nian, ami-nia mídia sira hala’o ona papél krusiál ida hodi harii fali konfiansa, demokrasia, no identidade nasionál,” nia hatutan.
Uma Balibo, uluk hanesan sasin nonook ba trajédia 1975, agora transforma ona ba sentru komunidade, edukasaun, no esperansa liuhusi apoiu husi parte oioin, inklui Balibo House Trust no parseiru internasionál sira.
Nune’e mós iha biban ne’e, lansa programa bolsa estudu ba joven jornalista Timor-Leste, ne’ebé fasilita husi ABC Development International (ABC ID).
Prezidente CITL hato’o ninia apresiasaun kle’an ba ABC ID ba sira-nia kontribuisaun hodi hasa’e kapasidade profisionál jornalista sira-nian no hametin ekosistema mídia nasaun nian.
“Ami espresa ami-nia gratidaun sinseru ba apoiu ne’ebé iha impaktu pozitivu ba ami-nia komunidade, liuliu labarik sira no joven sira—futuru nasaun ida-ne’e nian”nia hateten.
Enkuantu komemorasaun ne’e lori vigór foun, Cesar Mali fó hanoin katak justisa ba trajédia Balibo Five seidauk realiza tomak. Nia husu atu kontinua luta ba lia-loos no justisa.
“Labele haluha sira-nia sakrifísiu. Ita hotu-liuliu família sira husi Balibo Five hein kle’ur ona justisa. Mai ita luta nafatin atu nune’e loron ida lia-loos sei sai nakloke”nia subliña.
Trajédia Balibo akontese iha loron 16 fulan-Outubru tinan-1975, bainhira jornalista australianu na’in-lima mate bainhira halo kobertura kona-ba operasaun militár iha Timor-Leste. To’o ohin loron, eventu ne’e sai nafatin hanesan símbolu signifikativu ida iha istória imprensa nian no luta ba direitus umanus iha rejiaun ne’e.
Notisía relevante:Selebra Balibo Five: Hametin relasaun ema ho ema entre TL – Austrália
Jornalista:Sergio da Cruz
Editór: Rafael Ximenes de A. Belo
