DILI, 20 Outubru 2025 (TATOLI)—Ekipa Maudoko Football Club (FC) gaña pontu tolu hafoin sulan golu 10-0 bainhira kontra Na’in-Feto FC iha jogu primeira divizaun Liga Futeból Famininu Timor-Leste (LFFTL) ne’ebé realiza iha Estádiu Munisipál Dili, Segunda ne’e.
Golu sanulu referidu, Maudoko FC enxe liuhosi jogu primeiru parte ho golu 5-0 ne’ebé prodús husi jogadór Feni iha minutu 7, Serena iha minutu 11, 28, 31 no Ángela iha minutu estra 45+1.
Iha segunda volta, Maudoko FC kontinua hasa’e ritmu jogu hodi halo atake ba área grandeia iha-ne’ebé rezulta golu lima tan ne’ebé prodús husi jogadór Feni hodi kompleta hattrick iha minutu 46 no 83.
Enkuantu, golu tolu seluk enxe husi Sonia iha minutu 54, Noemia minutu 77 no Serena iha minutu 78 iha-ne’ebé sai mellór markadór iha jogu entre Maudoko FC kontra Na’in-Feto hodi rezultadu ikus manán ho skor boot 10-0.
Ho rezultadu jogu ne’e, Maudoko FC lidera provizória tabela klasifikasaun ho pontu tolu (3) no produtividade golu 10, enkuantu Na’in-Feto FC obrigadu tenke túr iha pozisaun sanulu (10) iha tabela klasifikasaun LFFTL.
Jornalista: Natalino Belo
Editór: Xisto Freitas da Piedade
