DILI, 13 Jullu 2026 (TATOLI)-Ministru Transporte no Komunikasaun (MTK), Miguel Marques Manetelu, no Ministru Justisa (MJ), Sérgio Hornai, hato’o mensajen ba Ajénsia Notisioza Timor-Leste Tatoli, I.P, hodi husu instituisaun ne’e nafatin hatudu profisionalizmu no imparsialidade iha publikasaun notísia sira.
Mensajen ida-ne’e hato’o iha ámbitu selebrasaun aniversáriu Tatoli ba da-X, ne’ebé marka tinan sanulu nia ezisténsia husi 27 Jullu 2016 to’o 27 Jullu 2026.
Ministru Transporte no Komunikasaun, Miguel Marques Manetelu hateten katak maski Tatoli sei nurak, nia espera katak notisía sira ne’ebé instituisaun ne’e publika bele ajuda povu hetan informasaun ne’ebé loos no krevidel, nune’e populasaun bele hela ho serteza no la hetan informasaun ne’ebé bele kria inserteza.
“Husu ema hotu ne’ebé haknaar an iha Tatoli atu mellora imi-nia hanoin ne’ebé di’ak, nune’e Tatoli ba oin bele sai mídia Estadu nian ne’ebé garante mós ita-nia estabilidade tanba informasaun ne’ebé sala bele kria instabilidade, ida-ne’e mak esperansa ba Tatoli”, Miguel Manetelu hateten ba Tatoli, ohin.
Governante ne’e hateten notisía sira ne’ebé públika iha Tatoli iha diferensa ho mídia sira seluk tanba iha publika iha dalen haat hanesan portugés, tetun, indonézia no inglés, maibé iha lia-indonézia ne’e mak tenke hadi’ak liután.
“Durante publikasaun notísia sira haree tuir duni konteúdu ne’ebé iha, la’ós tanba tuir ami-nia hakarak maibé pelu menus fó informasaun ne’ebé loos. Rekomendasaun mak kontinua mellora imi-nia an, nune’e sai mídia ne’ebé profisionál liu”, sujere.
Iha sorin seluk, Ministru Justisa, Sérgio Hornai, hato’o parabéns bá Tatoli, ne’ebé dinámiku tebes hodi kontribui ba sosiedade ida-ne’e.
Nia sujere ba Tatoli atu promove nafatin kapasidade instituisionál no bele haklaken informasaun ba iha públiku, nune’e bele akompaña informasaun ida ne’ebé kredivel liu ba dezenvolvimentu iha rai-laran.
“Parabéns Tatoli, hatudu nafatin ita-boot sira-nia profisionalizmu, hatudu ita-boot sira-nia imparsialidade hanesan jornalizmu ida-ne’ebé profesionál atu haklaken Timor-Leste ninia dinámika progresu sira ba sosiedade ho objetivu informasaun sira ne’ebé klara liu, nune’e bele tulun iha sira-nia desizaun rasik”, dehan.
Nia dehan Tatoli dezenvolvimentu maka’as loos maski identifika dezafiu sira, maibé esforsu-an hodi hakat ba oin.
Notísia relevante: Konsellu Imprensa husu Tatoli reforsa kobertura iha área ekonomia no reportajen kle’an
Jornalista: Arminda Fonseca
Editora: Maria Auxiliadora
