Konsellu Imprensa husu Tatoli reforsa kobertura iha área ekonomia no reportajen kle’an
DILI, 10 Jullu 2026 (TATOLI) – Konsellu Impresa Timor-Leste (CITL, sigla portugés) husu ba Ajénsia Notisioza Tatoli, I.P., atu hakle’an kobertura iha área ekonomia, halo reportajen feature no in-depth reporting (reportajen kle’an), hodi hasa’e kualidade produtu jornalístiku sira ba públiku.
Prezidente Interina CITL, Suzana Cardoso, hato’o mensajen ne’e bainhira sai oradór iha Programa Tatoli “Bainaka Kredivel”, ho tema “Papél Konsellu Imprensa Timor-Leste ba Garante Liberdade Imprensa no Espresaun”.
“Mensajen husi Konsellu Imprensa mak hakle’an kobertura iha área ekonomia, reportajen feature nomós in-depth reporting”, Suzana Cardoso sujere, ohin.
Nia mós hato’o parabéns ba Tatoli, ne’ebé sei selebra nia aniversáriu ne’ebé marka tinan sanulu husi nia ezisténsia hahú iha 27 Jullu 2016 to’o 27 Jullu 2026.
Ho selebrasaun tinan ida-ne’e, Suzana husu atu Tatoli halo avaliasaun ba área sira ne’ebé durante ne’e sei menus no seidauk atinje alvu no espera katak hamutuk ho Konsellu Imprensa hodi hadi’a no hasa’e liután padraun profisaun jornalístika.
Nia dehan papél Konsellu Imprensa mak hodi garante liberdade imprensa no espresaun iha Timor-Leste. Konsellu Imprensa harii nu’udar entidade administrativa independente ida, nia kria bazeia ba Lei Komunikasaun Sosiál iha tinan 2014 ne’ebé dekreta iha Agostu 2015.
Objetivu prinsipál husi órgaun ne’e mak atu sai reguladór ba mídia no proteje jornalista sira hodi garante liberdade imprensa.
Konsellu Imprensa nia atividade importante sira mak oinsá halo regulamentu ba mídia sira define orientasaun hodi asegura observasaun ba direitu, devér no étika jornalista.
Papél CITL mak kapasita jornalista foun no ezistente sira, promove literasia mídia no kombate informasaun falsa sira. Apoia no atende sidadaun sira ne’ebé sente la satisfás ho serbisu jornalista sira-nian.
Tuir nia, Konsellu Imprensa rasik mós iha ninia visaun no misaun. Misaun mak oinsá sai matadalan hodi foti desizaun hodi dezenvolve kualidade mídia nasionál sira. Vizaun mak sosiedade ne’ebé livre, respeita pluralizmu espresaun no liberdade imprensa.
“Tanba papél Konsellu Imprensa mak garante katak liberdade imprensa no direitu públiku atu hetan informasaun bele proteje ho di’ak. Oinsá ita proteje liberdade imprensa ne’e depende jornalista atu halo serbisu jornalistiku livre lahó intimidasaun, sensura ka intervensaun ne’ebé la tuir Lei Komunikasaun Sosiál, Kódigu Étika Jornalista nomós lei inan ne’ebé hatún ona iha Konstituisaun RDTL iha artigu 40 no 41”, nia dehan.
Aleinde ne’e, Konsellu Imprensa funsiona atu hametin indepedénsia mídia, garante katak instituisaun mídia sira bele hala’o knaar indepedentemente husi influensia polítika, ekonómika ka interese seluk.
Konsellu Imprensa mós hala’o funsaun simu noa analiza keixa públiku, no fasilita rezolusaun ba keixa husi komunidade kona-ba konteúdu jornalistiku, tuir prinsípiu justisa, imparsialidade no direitu atu responde.
“Husi ida-ne’e atu hateten katak, papél sira ne’e hotu hodi kontribui ba hametin demokrasia, aumenta konfiansa públika ba mídia no garante sidadaun sira atu asesu ba informasaun ne’ebé loos no responsabilidade”, nia konklui.
Notísia relevante: Aniversáriu ba da-X, Lamukan husu TATOLI tenke sai referénsia kredivel ba mídia seluk
Jornalista: Arminda Fonseca
Editora: Maria Auxiliadora
