LIKISÁ – Aldeia rua; Hekar no Lisaiko, suku Dato, postu administrativu Likisá Vila, Munisípiu Likisá selebra finadu hamutuk hodi halo orasaun hamutuk ba matebian sira.
Husi aldeia rua ne’e iha uma-lisan hamutuk sia (9) mak hanesan; Taha Ma’u Beisolo Soa Ba, Taha Ma’u Beisolo Soa Klau, Bere Bere Laukala Soa Kabu Roda, Bere Besi Laukala Soa Laga, Bere Besi Laukala Majór, Asu Leku Maupelu, Mete Bere Maukdesa, Kolo Bere Mausaka no Meta Bere Maukdesa Laueli.
Adelino de Graça nu’udar lia-na’in husi Uma-lisan Bere Bere Laukala Soa Kabu Roda, esplika selebrasaun finadu iha uma-lisan sia ne’e sempre la’o hamutuk no kari ai-funan mós tenke hala’o dala-ida de’it.
Tanba tuir nia katak, ne’e nu’udar kustume ne’ebé rai hela husi bei-ala sira no to’o oras ne’e jerasaun husi uma-lisan sia ne’e tenke hatutan ba oin.
“Kari ai-funan hamutuk ne’e dezde bei-ala sira, uma-mane no mane-foun hosi uma lisan sia ne’e hamutuk. Ne’e hatudu katak fraternidade hosi jerasaun ba jerasaun kontinua hametin kultura unidade ida-ne’e,” Adelino de Graça ba TATOLI bainhira kari ai-funan iha rate hodi selebra finadu hamutuk, domingu ne’e.
António dos Santos nu’udar lia-na’in husi uma-lisan Bere Besi Laukala Majór, informa kada tinan laiha ema ida ka uma-lisan ida mak ba kari mesak ai-funan iha rate tanba tenke hein hotu iha uma lisan sia ne’e hafoin maka bele kari ai-funan.
“Ai-funan bele lori husi ida-idak nia uma, maibé atu kari ne’e tenke malu hodi halo orasaun hamutuk hafoin kari ba rate sira-ne’e, tanba ne’e nu’udar ami-nia kustume ona, ne’ebé ami laiha podér atu muda, tanba istória husi uluk kedas to’o agora ne’e la’o hanesan ne’e,” António dos Santos, hateten.
Ximenes Vidigal nu’udar jerasaun husi uma-lisan Taha Ma’u Beisolo Soa Ba, haktuir selebrasaun finadu dezde bei-ala sira la’o hanesan ne’e.
“Ne’e labele muda, sé muda karik, entaun uma-lisan sia ne’e tenke tuur hamutuk, mas la’o hanesan ne’e hatudu ami-nia unidade, tanba uma-lisan sia husi aldeia rua ne’e mesak família de’it. Ohin ita reza ka halo orasaun hamutuk atu matebian sira bele hetan naroman,” Ximenes Vidigal esplika.
Silvestre dos Santos nu’udar lia-na’in husi uma-lisan Kolo Bere Mausaka, subliña finadu ne’e melekat ona iha lisan no kultura.
“Ohin, ami selebra finadu ba tinan 2025 nian hodi halo orasaun hamutuk ba matebian sira, nune’e mós ami husu atu matebian sira mós bele tulun ami, atu ami labele hetan moras, tanba asaun hanesan ami aplika mós iha atividade sau-batar ne’e,” nia akresenta.
Nia dehan, kada tinan selebra finadu ne’e sempre hamutuk, katak laiha ema individu ida mesak mak kari mesak ai-funan iha rate, tanba ne’e nu’udar ona kustume no labele halo mudansa.
Joaquim Pereira dos Santos nu’udar jerasaun husi uma-lisan Mete Bere Maukdesa, sente kontente ho selebrasaun iha tinan ida-ne’e tanba jerasaun sira husi fatin dook mai hotu.
“Ne’e hanesan kultura unidade ida-ne’ebé kontinua ba oin, ida-idak bele iha ninia lisan rasik maibé lori ai-funan ba rate ba jerasaun uma lisan sia ne’e sai no reza hamutuk iha rate hafoin kari ai-funan hamutuk,” nia katak.
Nia hatutan, iha fatin seluk ida-idak ba kari ai-funan, maibé úniku uma lisan sia ne’e maka selebra finadu hamutuk.
“Ha’u kontente tanba uma lisan sia ne’e banati nafatin unidade dezde be-iala rai hela. Ami sei kontinua unidade ne’e ba oin, tanba unidade ida-ne’e mós hatudu iha sentidu hosi finadu ne’e,” nia subliña.
Tuir observasaun TATOLI iha terrenu, família sira husi Dili, Likisá Vila hahú dadeersan hakat ba uma-lisan ida-idak no parte lokraik halo orasaun hamutuk hafoin kari ai-funan.
Nune’e mós halo orasaun no kari ai-funan hamutuk iha rate jerál hafoin ba kari ai-funan iha rate hirak-ne’ebé dook oituan husi rate jerál no ikus liu ida-idak fila ba uma. Jerasaun husi uma-lisan sia ne’e besik rihun-ida mak selebra finadu ba tinan ida-ne’e.
Jornalista : Evaristo Soares Martins
Editór : Florencio Miranda Ximenes
