VIKEKE, 04 Novembru 2025 (TATOLI)—Abitante husi Aldeia Abadere, Suku Babulu, Postu Administrativu Uatulari, Munisípiu Vikeke, Delfin Fernandes, preokupa kondisaun estrada ligasaun Abadere ne’ebé daudaun ne’e kondisaun grave difikulta komunidade nia movimentu.
“Husi suku liga mai iha-ne’e (Abadere) distánsia purvolta kilómetru 40. Kondisaun estrada grave tebetebes. Nune’e, ami hakarak husu Governu karik bele hadi’a ami-nia estrada, atu ami bele asesu,” Delfin Fernandes ba jornalista sira iha Postu Uatulari, Tersa ne’e.
Delfin hatutan komunidade Abadere iha produtu lokál barak hanesan kamii, kafé, rotan no produtu sira seluk, maibé sira labele lori bá merkadu tanba kondisaun estrada ladi’ak.
“Estrada ne’e iha tempu udan ema la’o de’it mós araska. Aleinde ne’e moras emerjénsia hanesan inan isin-rua no moras grave ruma ami tenke hulan hodi hakur mota hafoin asesu ba fasilidade saúde. Foin lalais iha fulan Outubru ne’e inan isin-rua ida atu partu, maibé lori sai labele to’o la konsege salva bebé,” nia hato’o.
Delfin haktuir problema estrada kada Governu komunidade hato’o beibeik, maibé to’o agora seidauk responde.
“Tanba ne’e, ami hakarak husu ba Ministériu Obra Públika (MOP) haruka Institutu Jestaun Ekipamentu no Apoiu ba Dezenvolvimentu Infraestrutura, Institutu Públiku (IGEAD, I.P.) hodi halo normalizasaun ba estrada referida,” nia solisita.
Tuir dadus, populasaun Abadere iha uma-kain hamutuk 20, lokalizadu iha foho.
Jornalista: Vitorino Lopes da Costa
Editór: Xisto Freitas da Piedade
