DILI, 04 Novembru (TATOLI) – Peru hakotu relasaun diplomátiku ho Méxiku hafoin akuza nasaun ne’e fó azilu ba eis-primeira ministra Betssy Chavez, ne’ebé maka hetan julgamentu tanba alegadu tentativa golpe Estadu nian iha tinan 2022.
Ministru Negósiu Estranjeiru Hugo de Zela hatete ba jornalista sira katak responsável peruanu sira hatene antes iha loron ne’e katak eis-primeira-ministra Betssy Chavez, ne’ebé serbisu iha Prezidente Pedro Castillo nia okos, halai ba embaixada.
Ministériu Negósiu Estranjeiru Méxiku nian la hatán kedas ba pedidu ida ba komentáriu.
“Hodi hatán ba hahalok la amigável ne’e, no konsidera okaziaun sira-ne’ebé repetidu iha-ne’ebé maka prezidente atuál no antigu sira hosi nasaun ne’ebá interfere iha asuntu internu sira Peru nian, Governu peruanu desidi ona ohin hodi hakotu relasaun diplomátiku sira ho Méxiku,” Hugo de Zela hatete.
Chavez hasoru hela akuzasaun kriminál sira tanba nia alegadu papél iha Castillo nia tentativa atu disolve Kongresu iha finál 2022. Castillo hetan destituisaun no sei iha hela prizaun.
Chavez tama prizaun dezde Juñu 2023, maibé hetan libertasaun hosi juis ida iha fulan-Setembru, enkuantu nia julgamentu hala’o hela.
Advogadu Raul Noblecilla ne’ebé fó asisténsia legal ba Betssy Chavez, hatete ba estasaun rádiu lokál RPP katak nia la rona hosi nia kliente iha loron balun nia laran no la hatene sé nia husu azilu ka lae.
Chavez nia kondutór uluk fó sasin katak nia husu atu nia lori nia ba embaixada Méxiku nian tanba Castillo nia tentativa atu sobu Kongresu hala’o daudaun, molok fila ba nia eskritóriu.
Chavez nega katak nia tenta atu to’o iha embaixada iha momentu ne’ebá, no nega ona katak nia hatene kona-ba planu Castillo nian hodi disolve lejizlatura no Prokuradór sira husu ona kastigu tinan 25.
Fonte : Retuters
