DILI, 06 Novembru (TATOLI) –Primeiru-Ministru (PM), Kay Rala Xanana Gusmão, hato’o solidariedade bá Povu Filipina ne’ebé hasoru dezastre naturál Tufaun.
“Iha terramatu boot ida, iha Filipina ema lubun ida mate, sobu uma, posibilidade boot loron hirak mai bele hetan tsunami. Hodi povu Timor-Leste nia naran iha fukun ida-ne’e, ha’u atu aprezenta sentimentu solidariedade bá Povu Filipina,” Xefe Governu hato’o solidariedade ne’e liuhusi debate proposta Orsamentu Jerál Estadu (OJE) 2026 iha Parlamentu, ohin.
Governu haree hela atu deside hodi apoiu emerjénsia.
“Ohin, kedas depois enkontru, ami bele halo reuniaun Konsellu Ministru extraodináriu, hodi haree atu haruka kompañia enjeñaria ho serbisu sanitária husi F-FDTL atu ba ne’ebá, hodi partisipa apoiu emerjénsia nu’udar membru foun ASEAN nian, hodi hamriik hamutuk bele ajuda, ita hakarak hatudu uza ita-nia forsa ba iha misaun umanitária asisténsia ba vítima,” Xefe Governu hateten.
“Ha’u atu informa ba ita-boot sira, aprezenta tiha ba Prezidente Filipina, ita-nia solidariedade nu’udar membru foun ASEAN nian, atu fó sentidu liu ba ita-nia espíritu ne’ebé pás, solidariedade”.
Hafoin Xefe Governu hasai deklarasaun ne’e, Ministru Prezidénsia Konsellu Ministru no Portavós Governu nian, Agio Pereira, hasai nota imprensa ida katak, Filipina ohin loron hasoru trajédia ida ne’ebé boot tebes, no povu Timor-Leste la ignora sofrimentu ida-ne’e.
“Ita-nia istória no lasu kooperasaun rejionál signifika katak Filipina nia terus hanesan mós ita-nian hotu. Ami hotu prontu atu oferese apoiu tomak ne’ebé presiza”.
Portavós Governu nian hatutan “ami-nia hanoin hamutuk ho vítima sira no sira-nia famílias no ami rekoñese esforsu ne’ebé la hatene kolen husi ekipa salvamentu no profisionál sira ne’ebé kontinua fó asisténsia ba populasaun sira ne’ebé afetadu husi katástrofe ida-ne’e”.
Governu Timor-Leste reafirma ninia kompromisu ba solidariedade rejionál no kooperasaun entre povu sira Sudeste Aziátiku nian, hodi espresa konfiansa iha Filipina nia kapasidade ba rekuperasaun no rekonstrusaun hafoin dezastre naturál ida-ne’e.
Notísia relevante: Tufaun iha Filipina, númeru mate sa’e ba 114
Jornalista: Nelson de Sousa
Editór: Evaristo Soares Martins
