DILI, 03 Dezembru 2025 (TATOLI)—Prezidente Repúblika, José Ramos-Horta, husu atu liberta sidadaun sira-ne’ebé moris ho kondisaun defisiénsia ka Ema ho Defisiénsia husi obstákulu.
Kestaun ne’e Prezidente Repúblika hato’o iha Serimónia Abertura Promosaun Talentu Ema ho Defisiénsia, ne’ebé organiza husi Asosiasaun Ema ho Defisiénsia Timor-Leste (ADTL), ho tema “Haburas sosiedade inkluziva ba ema ho defisiénsia hodi hakat ba progresu sosiál” iha Palásiu Prezidensiál Nicolau Lobato, Bairru Pite.
Reprezentante Prezidente Repúblika, Xefe Kaza Sivíl Palásiu Prezidensiál, Jesuína Maria Ferreira Gomes, husu atu Timor-Leste avansa ba modelu ida ne’ebé garante autonomia, dignidade no partisipasaun tomak ba ema ho defisiénsia, hodi liu dependénsia esesiva ba apoiu asistensiál sira.
Prezidente Ramos-Horta subliña, objetivu la’ós de’it atu fó subsídiu maibé kria kondisaun atu sidadaun sira ho defisiénsia hodi bele jere sira-nia moris ho independénsia totál husi ema seluk.
“Ita tenke liberta sira husi obstákulu, atu nune’e sira labele depende barak liu ba kbiit maternál ka paternál, Governu ka autoridade nasionál sira,” Xefe Estadu hateten liuhusi diskursu ne’ebé lee husi Xefe Kaza Sivíl.
Diskursu ne’e destaka mós esperiénsia pozitiva atleta Paralímpiku Timoroan sira-nian, ne’ebé haree ona sidade asesivel sira iha rai-li’ur.
Iha sentidu ne’e, hodi husu ba autoridade lokál no munisípiu sira atu adota padraun hanesan, hodi asegura seguransa no mobilidade di’ak liu iha Dili.
Iha diskursu ne’e, Prezidente reafirma mós kompromisu Timor-Leste nian ho Konvensaun Nasaun Unida kona-ba Direitu Ema ho Defisiénsia (CNUDPD), hodi defende katak kompromisu ne’e tenke tradús ba asaun konkreta sira-ne’ebé garante partisipasaun sívika no protesaun hasoru diskriminasaun.
Iha okaziaun ne’e, Xefe Kaza Sivíl hato’o mós agradesimentu Prezidente nian ba parseiru prinsipál sira inklui Governu Austrália, Organizasaun Mundiál Saúde (OMS) no Ministériu Solidariedade Sosiál no Inkluzaun (MSSI) ba apoiu kontínuu ba ADTL.
Diskursu ne’e ramata ho apelu mobilizadór ba setór hotu iha sosiedade, husi munisípiu to’o empreza privada sira atu promove ambiente inkluzivu ida-ne’ebé ema ho defisiénsia bele sai “Sidadaun ne’ebé Haksolok, Ativu no Produtivu.”
Jornalista : Hortencio Sanchez
Editór : Cancio Ximenes
