DILI, 05 Dezembru 2025 (TATOLI) – Loron 07 Dezembru, nu’udar data importante ba timoroan sira, tanba iha momentu ne’e mak forsa indonéziu halo invazaun iha territóriu Timor-Leste, hafoin nasaun proklama tiha nia independésia unilaterál iha 28 Novembru 1975.
Hodi komemora loron istóriku ne’e mak deputadu husi Partidu Kongresu Nasionál Rekonstrusaun Timorense (CNRT sigla portugés), Domingos Augusto ‘Deker’, hateten loron invazaun ne’e nu’udar momentu krusiál atu timoroan hotu fó onra no valoriza ba luta-na’in sira.
Nia relembra katak loron invazaun ne’e hetan rezisténsia husi povu Timor-Leste durante funu iha tinan 24 nia laran.
“Ho selebrasaun tinan 50 liubá kotuk, ita la sente buat ida, maibé ho loron istóriku ne’e, iha minutu balun hakru’uk hodi fó onra no valorizasaun ba ita-nia erói no mártir no ema hotu rihun ba rihun mate hodi konkretiz ukun rasik-an”, nia hato’o.
Hodi apela ba foinsa’e sira hodi kontribui ba pás no estabilidade, nune’e bele lori erói no mártir sira nia mehi hakat ba oin katak liberta ona pátria no indepedente no agora luta ba libertasaun povu.
Iha fatin hanesan, deputadu Patrocínio dos Reis Fernandes, dehan iha jornada luta libertasaun pátria ne’ebé hetan atake maka’as husi okupasaun ilegál militár Indonézia halo vítima barak mate.
Husi ne’e, sunu espíritu timoroan sira-nian, hamriik hamutuk iha liña ida ho forsa hodi kontra invazaun ida iha territóriu ho ilegalmente to’o konkretiza independénsia.
Tanba ne’e, nu’udar sidadaun ho momentu istóriku ne’e halo reflesaun kona-ba independénsia ne’ebé ohin loron iha no mai husi prosesu naruk ida ne’ebé ema barak sakrifika nia vida.
Nia observa katak país kompleta ona nia independénsia ba tinan 23 iha prosesu dezenvolvimentu hodi harii Estadu, konsolida prosesu demokrásia no integra iha organizasaun mundiál oioin. Hodi apela ba timoroan hotu atu hamutuk lori progresu ba moris di’ak povu nian.
Notísia relevante: Falur: Komemorasaun 7 Dezembru hanesan loron reflesaun ba timoroan
Jornalista: Nelson de Sousa
Editora: Maria Auxiliadora
