DILI, 06 dezembru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul Falur Rate Laek, hateten Komemorasaun 7 Dezembru 1975 ba dala 49 iha tinan ne’e nudar loron reflesaun ba timoroan hotu nia luta.
¨7 Dezembru ne’e loron ida invazaun. Invazaun ne’e ita koñese ita-nia identidade. Ba ema hotu halo reflesaun profunda tanba iha tinan 49 liu ba ema lakon nia vida iha loron ida-ne’e, ema hetan mate no susar, halo sakrifísiu, hahú husi loron ida-ne’e. Maske ita susar no terus oioin, vale apena ita manan tanba ne’e loron ida-ne’e sai refleta ba ita timoroan sira¨, Tenente Jenerál Falur Rate Laek hateten ba jornalista sira hafoin partisipa iha serimónia lansamentu livru Primeiru-Ministru Xanana Gusmao ho tema ¨The Sky is ours¨ ne’ebé hala’o iha salaun Ministériu Negósiu Estranjeiru no Kooperasaun, Pantai Kelapa, sesta, ohin.
¨Ba joven sira agora tenke sai jerasaun kontinuadór, joven tenke sai joven ne’ebé di’ak, nafatin sai parte solusaun ba problema, labele sai parte ba problema¨, nia adianta.
Iha fatin hanesan, Ministru Justisa Sergio Hornai, hateten loron 7 Dezembru nudar loron istóriku ba timoroan sira tanba ne’e hothotu tenke fo onra ba martir sira ne’ebé ohin loron tranforma Timor-Leste sai nasaun sobernu.
¨Sira fo sira nia aan ba mate hodi defende pátria ida-ne’e, ohin ita hotu sai país ida independente, sai país ida soberanu, ha’u hanoin ita orgullu. Tanba ne’e ita presiza halo reflesaun ba tinan sira liu ba, loron ida- ne’e nudar loron nakukun no tristeza ba timoroan maibé ohin ita orgullu ita sai nasaun soberanu¨, nia konklui.
Jornalista: Natalino Costa
Editór : Zezito Silva
