VIKEKE, 05 Dezembru 2025 (TATOLI)—Xefe Suku Uma-Tolu, Postu Administrativu Lakluta, Munisípiu Vikeke, Eduardo Soares, informa akontesimentu udan boot mota tun afeta ba ponte Sumaku kotu totál, tan ne’e daudaun ne’e movimentu transporte públiku sira liuhusi fali mota laran.
“Akontesimentu udan boot iha semana ne’e mota tun estraga ponte Sumaku ne’ebé liga Postu Lakluta no Vikeke Vila. Nune’e, daudaun ne’e ita-nia transporte sira tantu karreta no motorizada tenke liuhusi mota laran mak foin liubá mota sorin,” Eduardo Soares ba TATOLI iha Postu Vikeke Vila, Sesta ne’e.
Xefe Suku Uma-Tolu ne’e haktuir katak akontesimentu ne’e nia informa ona ba empreza Boa Ventru II ne’ebé kaer obra estrada ligasaun Postu Lakluta nian atu harii pronte emerjénsia, maibé tempu udan mota tun sei sobu filafali de’it.
“Daudaun ne’e komunidade uza mota laran hodi halo movimentu, maibé ba transporte sira-ne’ebé trasaun di’ak. Karreta sira-ne’ebé laiha trasaun ne’e hasoru difikuldade. Bainhira mota tun, motorizada sira hakarak liu tenke selu ema hodi hulan liu ba mota sorin ho kustu $5-$10.
Iha fatin ketak, Xefe Suku Dilór, Jacinto Ximenes haktuir nia mós koordena ona ho empreza Boa Ventura II hodi halo normalizasaun, maibé udan para mak foin hahú.
Jornalista: Vitorino Lopes da Costa
Editór: Xisto Freistas da Piedade
