VIKEKE, 01 Dezembru 2025 (TATOLI)—Koordenadór ONG Rais Hadomi Timor Oan (RHTO) Munisípiu Vikeke, Natalino Pinto, hateten katak RHTO kontinua harii fasilidade asesibilidade ba ema ho defisiénsia iha Edifísiu Sentru Ensinu Báziku Kabira-Oan (EBC), Postu Vikeke Vila.
“Iha tinan 2025, ami sei kontinua kria kondisaun asesibilidade ba ema ho defisiénsia sira atu nune’e sira bele asesu ba edukasaun iha eskola EBC Kabira-Oan. Asesibilidade ne’ebé ami harii ne’e iha forma rampa hodi liga ba haris-fatin no saladeaula sira. Ida-ne’e permite ema ho defisiénsia sira hanesan uza kadeira-roda bele asesu ba ida-ne’e,” nia dehan ba TATOLI iha Segunda ne’e.
Nia informa konstrusaun fasilidade asesibilidade iha EBC Kabira-Oan ramata ona no estudante ho defisiénsia sira komesa bele asesu ona. Iha tinan kotuk, RHTO harii fasilidade asesibilidade iha Edifísiu Notariadu Munisípiu Vikeke, Eskola Sekundária Kalixa no Eskola Sekundária 04 Setembru.
“Asesibilidade ne’e ami rasik maka harii no fundu hosi RHTO aloka ba dezenvolvimentu asesibilidade. Ho asesibilidade ne’e, bele ajuda ami nia maluk sira ho defisiénsia atu asesu ba eskola sira. Durante ne’e, ami halo observasaun ba edifísiu eskola sira-ne’e nune’e ami harii asesibilidade tuir padraun internasionál,” nia salienta.
Tanba ne’e, Natalino tenik, bá-oin RHTO sei kontinua harii asesibilidade ba edifísiu públiku sira ne’ebé la asesivel ba ema ho defisiénsia sira hanesan edifísiu eskola no sede suku sira.
Dezenvolvimentu asesibilidade ne’ebé harii husi RHTO iha EBC Kabira-Oan ho totál fundu $8000.00. Bazeia ba dadus, estudante ho defisiénsia iha EBC Kabira-Oan hamutuk na’in-12 ne’ebé oras ne’e hala’o hela estudu.
Jornalista: Vitorino Lopes da Costa
Editór: Xisto Freitas da Piedade
