VIKEKE, 05 Dezembru 2025 (TATOLI)—Xefe Suku Dilór, Postu Administrativu Lakluta, Munisípiu Vikeke, Jacinto Ximenes informa konstrusaun sentru investimentu haki’ak fahi iha Suku Dilór daudaun ne’e hahú implementadu ona.
“Prosesu konstrusaun ba sentru haki’ak fahi iha ami-nia suku komesa la’o ona, maibé daudaun ne’e tempu udan mak difikulta ami-nia servisu,” Jacinto Ximenes ba TATOLI iha Postu Vikeke Vila, Sesta ne’e.
Nia haktuir daudaun ne’e komesa ateru no fulan ida-ne’e seidauk bele konkluidu, maibé fulan-Janeiru 2026 ne’e bele finaliza ona.
Iha fatin ketak, Diretór Programa Nasionál Dezenvolvimentu Suku (PNDS), Francisco Soares Varela, informa obra investimentu haki’ak fahi iha Suku Dilór ne’e hahú implementadu iha fulan-Novembru ne’ebé atinje ona 40%.
Obra ne’e gasta orsamentu adisionál hamutuk $53.400,00 no membru grupu haki’ak fahi iha Suku Dilór hamutuk na‘in-15, kompostu husi Xefe Suku Dilór hanesan koordenadór grupu no membru maihusi kada aldeia sira iha Suku Dilór.
Jornalista: Vitorino Lopes da Costa
Editór: Xisto Freistas da Piedade
