VIKEKE, 06 dezembru 2025 (TATOLI) – Abitante Aldeia Babulu, Postu Uatulari, Munisípiu Vikeke, João Humberto, husu ba governu atu hadi’a estrada ne’ebé liga mota Bebui, iha suku Afaloikai, no suku Babubu, tanba daudaun ne’e estrada kondisaun aat tebes no difikulta movimentasaun transporte durante époka udan.
“Iha tempu udan karreta labele to’o iha suku Babubu, bainhira atu ba Dili tenke la’o ain to’o mota Bebui mak foin sa’e karreta. Nune’e mós bainhira fila husi Dili bis labele to’o iha ami-nia suku tanba kondisaun estrada aat. Ami husu hela ba governu atu ajuda hadi’a ami-nia estrada. Nune’e, bainhira udan monu rai bele asesu ba transporte ba Bebui,” João Humberto dehan TATOLI iha Postu Uatulari, ohin.
Komunidade Babulu ne’e hateten katak antes IGEAD I.P halo normalizasaun, impaktu husi udan boot rezulta estragus maka’as ba estrada. Estrada sira-neʼe bee nakonu, no halo transporte sai susar.
“Estrada ne’ebé liga ami-nia suku ne’e di’ak iha tempu bailoron, no transporte bele asesu ba ami-nia suku, maibé iha tempu udan hanesan agora ne’e, susar tebes ba ami,” nia realsa.
Entretantu, Lorença Mascarenhas, nu’udar abitante Babulu sente triste kondisaun estrada tanba atu tula fornesimentu ai-han no fornese merenda eskolár ba eskola Kaikasa Bubu susar tebes.
“Tanba ne’e, ha’u husu ba governu atu tau atensaun hodi hadi’a ita-nia estrada. Ida-ne’e maka ita presiza tebes. Tanba to’o agora, ita-nia ambulánsia ba tula pasiente sira mós difisil,” nia hato’o.
Iha sorin seluk, Lia-na’in aldeia Abadere, Gaspar Pinto, espera governu sei hadi’a estrada husi Bebui ba Babulu tanba estrada sira ne’e difikulta dadauk ema atu halo movimentu.
“Ami la husu buat barak ba governu, maibé ami husu ba governu atu hadi’a ami-nia estrada atu nune’e ami-nia viajen ba postu, munisípiu, no Dili la’o di’ak,” nia hateten.
Jornalista : Vitorino Lopes da Costa
Editór : Rafael Ximenes de A. Belo
