DILI, 17 Dezembru 2025 (TATOLI) – Governu klarifika akordu finansiamentu entre Governu Timor-Leste (TL) ho Banku Ázitiku Dezenvolvimentu (ADB, sigla inglés) la kansela projetu “Power distribuition modernization” ka Modernizasaun distribuisaun enerjia maibé só akordu finansiamentu ne’ebé maka halo antes ne’e ho ADB maka kansela.
Tanba tuir desizaun polítika ne’ebé adota ona iha reuniaun Konsellu Ministru liubá no diskusaun sira ne’ebé hala’o iha tempu ne’ebá, inklui konversa téknika adisionál sira ho ADB.
Nune’e Konsellu Ministru deside atu kontinua avaliasaun ba empréstimu iha ámbitu Rekursu Kapitál Ordináriu (OCR) ne’ebé relasiona ho Projetu “President Nicolau Lobato International Airport Expansion”, loron 01 fulan-janeiru tinan 2021, ho montante millaun $85, iha ámbitu polítika finanseira Estadu nian no jestaun responsavel ba dívida públika.
Iha kontestu ida-ne’e, Governu sei inísia diskusaun institusionál ho ADB ho objetivu atu negósia redusaun posível iha komponente finansiamentu ne’ebé temi ona, bazeia ba poupansa kustu ne’ebé identifika ona no iha aliñamentu ho kontinuidade ezekusaun projetu nian.
Enkuantu avaliasaun ne’e halo parte iha esforsu Governu nian ne’ebé luan liu atu garante utilizasaun ida-neʼebé efisiente, adekuadu no sustentavel ba rekursu públiku, inklui apresiasaun ho kritériu husi instrumentu finansiamentu ne’ebé relasiona ho projetu ida-idak, hodi konsidera nia grau ezekusaun, prioridade nasionál ne’ebé define ona no kapasidade implementasaun neʼebé efikás.
Antes ne’e Governu halo kansela ba akordu Finansiamentu balun ne’ebé mak vigora daudaun la nesesáriu ona hanesan projetu “Dili West Water Supply” – Fornesimentu Bee-moos Dili Oeste, 25 Outubru 2022, ho montante millaun $50.
Jornalista: Alexandra da Costa
Editór: Cancio Ximenes
