DILI, 07 Dezembru 2025 (TATOLI) – Iha ámbitu komemorasaun loron 07 Dezembru invazaun Indonézia mai Timor-Leste ba da-50, Primeiru-Ministru Kay Rala Xanana Gusmão, husu misa ba eroi no martir sira iha Igreja Santo Fransiskus Xaverius, Kuta, Bali, Indonézia.
Primeiru-Ministru, Xanana Gusmão, hateten katak ohin ba misa iha igreja Santo Fransiskus Xaverius, Kuta, tanba 07 Dezembru ba reza husu Maromak labele haluha martír sira ne’ebé hahú mate iha 07 Dezembru 1975 bainhira parakedista sira tuun iha Dili.
Nia haktuir, hothotu hatene bainhira Indonézia invade Timór iha 07 Dezembru 1975, ho situasaun ne’e populasaun barak halai ba foho Dare husik sira-nia rikusoin hotu.
“Ha’u ba misa reza husu mós ba Maromak ajuda instituisaun Estadu no ema hotu ne’ebé serbí instituisaun Estadu hodi hadi’a no hanoin serbí rai ida-ne’e ne’ebé merese duni ukun an, maibé depoizde restaurasaun independénsia tanba demokrasia dezenvolvimentu ladún la’o tanba tenke esforsu duni,” Xanana Gusmão hateten liuhusi vídeo ne’ebé TATOLI asesu domingu ne’e.
Nia haktuir, ho situasaun 07 Dezembru nunka bele haluha la’ós de’it sira ne’ebé mate iha Dili maibé sira ne’ebé hahú mate iha fronteira Batugade, Balibó iha Maliana no Suai, tanba 07 Dezembru inimigu okupa fatin barak ona.
Xefe Governu ne’e dehan, ho istória sira ne’e hotu ohin mós iha esplikasaun padre dehan labele lakon esperansa ba mudansa iha vida lorloron nian.
“Ha’u ba misa husu ba beiala sira eroi, martir sira tulun nafatin ami saida mak ami bele halo labele lakon esperansa katak sei halo di’ak liután,” nia konklui.
Notísia relevante:Assanami : 07 Dezembru loron reflesaun Indonézia invade Timór
Jornalista : Arminda Fonseca
Editór: Rafael Ximenes de A. Belo
