DILI, 06 Dezembru 2025 (TATOLI)— Vise Primeiru-Ministru no Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano “Assanami” Sabino, defende katak 07 Dezembru nu’udar loron importante ba povu Timor-Leste halo reflesaun ba Indonézia invade Timor-Leste.
Nia dehan, ba povu Timor-Leste tomak hothotu hamutuk hodi fó onra no glória ba eroi lutadór sira hotu ne’ebé luta esforsu halo determizasaun ba rai ne’e nian.
Membru Governu ne’e dehan, hodi hanoin katak tinan-50 liu ona iha loron 28 Novembru 1975 Timor-Leste halo proklamasaun Independénsia no iha 07 Dezembru 1975 invade tama kedas halo mate barak iha Dili, fronteira no fatin sira seluk, sira-nia mate no sakrifísiu mak sai determinasaun ba Timor-Leste nia ukun rasik an.
“Tanba ne’e 07 Dezembru hanesan reflesaun ida ba ita hanoin ema invade ita-nia rai, ho istória sira ne’e hotu tenke nakfilak ba valór, prinsípiu ne’ebé jerasaun foun sira bele kaer sai banati tuir, katak ita ho liberdade, pás no moris di’ak, ba oin tenke hothotu hamutuk halakon tiha vinga sira ne’ebé uluk ema halo ba ita, hanesan torturasaun ne’ebé la fó liberdade ba ita,” Mariano Assanami Sabino, hateten iha Aeroportu Komoro, Dili, hafoin akompaña Primeiru-Ministru Xanana Gusmão, halo viajen ba Indonézia.
Nia subliña, ho istória sira ne’ebé ba jerasaun foun sira agora hamutuk atu halo kompromisu onra idaidak nian ba rai katak lakohi tan iha konflitu, tantu timoroan ho timoroan.
“Mai ita hamutuk hametin ita-nia unidade nasionál, koezaun sosiál ne’ebé forte liután. Ita bele iha partidu diferente no organizasaun diferente maibé ita huun ida de’it, no povu ida de’it hamutuk ita dezenvolve ita-nia rai di’ak liu,” nia apela.
Ba joven sira iha rai-laran tenke aprende makaas tanba luta hanorin mai “ita dehan resistir para vencer, ida-ne’e tenke sai kompromisu ida ba oan sira estuda makaas dezenvolve rai ne’e ho di’ak”.
“Ita hotu hakaas-an luta ba Timór ida-ne’ebé di’ak liu tanba ita tama ona ASEAN, Organizasaun Mundiál Komérsiu (OMK) no g7+ ita tenke util iha organizasaun sira ne’e nune’e bele fó benefísiu di’ak ba ita-nia rai,” nia konklui.
Jornalista : Arminda Fonseca
Editór: Rafael Ximenes de A. Belo
