DILI, 10 Dezembru 2025 (TATOLI)—Xefe Eskola Jestaun Trisakti (TSM) Indonézia, Aulia Danibrata, kuarta ne’e, hasoru malu ho Prezidente Repúblika José Ramos-Horta hodi dsikute kona-ba setór edukasaun iha Timor-Leste, iha Palásiu Prezidensiál Nicolau Lobato, Bairru Pite, Dili.
“Enkontru ho Prezidente Ramos-Horta amigavel tebes, ami ko’alia asuntu edukasaun, Prezidente ho entuziasmu fahe no inspira ami ho nia servisu hodi avansa iha Timor-Leste. Ami apresia tebes ida-ne’e, tanba ami iha Indonézia rona no aprende ona kona-ba Prezidente Ramos-Horta, mezmu foin primeira-ves ha’u mai iha Timor-Leste,” Aulia hateten ba jornalista sira.
Nia dehan, enkontru ne’e ho objetivu atu hetan vizaun ida-ne’ebé luan liu ba edukasaun iha Timor-Leste.
Nia hatutan, durante ne’e TSM kolabora ho Institute of Business (IOB) iha Timor-Leste no fó ona bolsa estudu ba estudante na’in-hitu (7) husi Timor-Leste hodi kontinua sira-nia estudu to’o ramata.
“Ami hein katak kolaborasaun ida-ne’e ho Timor-Leste, no espesífikamente ho IoB, bele sai di’ak liután no forte liután iha futuru, hodi permite ami kontribui liután ba IOB no Timor-Leste,” nia dehan.
Prezidente TSM iha esperansa ba kolaborasaun luan no internasionál liután iha futuru ho universidade sira ho kualidade iha Timor-Leste aleinde IOB.
Iha fatin hanesan, Primeiru Vise Reitór ba Asuntu Akadémiku IOB, Vaze Sarmento Soares, hateten kolabora ona ho Universidade Ekonomia Trisakti dezde tinan rua liubá, hafoin asina MoU iha nível institusionál, ida-ne’e hahú ho atividade formasaun iha ne’ebe formadór sira husi Trisakti mai fó formasaun ba dosente IOB.
“Hafoin asinatura MoU iha nivel institusional, ami hahu atividade formasaun iha ne’ebé formadór sira husi Trisakti mak mai fó formasaun ba dosente IOB. Iha inísiu tinan ne’e, IOB haruka dosente seniór na’in-ru (2) a ba fó palestra iha Universidade Trisakti fulan rua liubá,” Vaze hateten.
Vise-Reitór ne’e subliña, tinan oin, parte rua (2) sei halo estudu komparativu ida-ne’ebé involve estudante timoroan sira ba vizita TSM hodi habelar liután sira-nia perspetiva kona-ba edukasaun iha rai-li’ur.
“Iha enkontru ho Prezidente Repúblika, Prezidente apresia ho kolaborasaun, partikularmente ho universidade sira-ne’ebé hahú hakbesik ona ba universidade parseiru sira, hanesan sira-ne’ebé iha Indonézia, hodi fó formasaun ba dosente sira nune’e bele fó formasaun ba estudante sira ne’ebé estuda iha universidade,” nia dehan.
Jornalista : Hortencio Sanchez
Editór : Cancio Ximenes
