KOVALIMA, 17 Dezembru 2025 (TATOLI)- Servisu Terra no Propriedade Kovalima hahú hosi Janeiru to’o loron 15 Fulan-Dezembru ne’e, rekolla ona reseita hamutuk $76.944,50 ba Kofre Estadu.
Diretór Terra no Propriedade Kovalima, Carlos Caetano relata, ninia parte rekolla reseita ne’e maihosi kontratu arrendamentu rai no uma Estadu ne’ebé maka komunidade sira okupa hodi hela no hala’o atividade negósiu.
“Foin lalais ne’e ita fó ona notifikasaun ba arrendatáriu durante ne’e pendente hela sira-nia pagamentu nune’e ita aplika multa 50%,”Nia hateten ba jornalista iha bairru Rompe.
Tuir lei prosesu pagamentu ba arrendamentu rai no uma Estadu ne’e katak bainhira komunidade ida maka konstrui uma iha rai Estadu kada fulan mínimu tenke selu $10 no másimu selu $50 no sira ne’ebé uja hodi halo atividade negósiu selu $100.
Enkuantu, tuir dadus iha tinan 2024 nian, Diresaun Terra no Propriedade munisípiu Kovalima rekolla osan hamutuk $ 56.645 kompara ho 2025 reseita ne’e aumenta ba $76.944,50.
Nia esplika reseita ne’e aumenta iha tinan 2025 tanba númeru arrendatáriu foun ne’ebé maka rejistu iha tinan ida ne’e hamutuk 136. No daudaun ne’e iha tan proposta hosi komunidade atu uja rai no uma Estadu hamutuk 54 ne’ebé iha hela prosesu avaliasaun dokumentu.
Diresaun Terra no Propriedade Kovalima oras ne’e identifika rai no uma Estadu lokaliza iha suku Debos postu Suai,Tilomar no Zumalai ne’ebé maioria uza ba rezidénsia privada.
Jornalista :Celestina Teles
Editór :Florencio Miranda Ximenes
