DILI, 11 Dezembru 2025 (TATOLI)—Atleta nasionál Timor-Leste modalide Taekwondo liuhusi ekipa feto gaña dahuluk medalla osan-metan iha kompetisaun desportu SEA Games 2025.
Atleta Timor-Leste modalide Taekwondo kategoria Poomsae hamutuk na’in-tolu ne’ebé iha kompetisaun aprezenta téknika (jurus) no rezulta gaña medalla osan-metan hafoin derrota ho ekipa atleta husi Malázia ho diferensa skor 910.
Atleta Taekwondo na’in-tolu referida hanesan Merinda da Costa Soares, Dircia Cláudia Punef no Try Xena Dias joga iha meiu finál hasoru Malázia gaña skor 7.590, enkuantu ekipa adversária rekolla skor 8.500.
Mezmu nune’e, modalide Taekwondo kategoria ekipa feto iha kompetisaun Poomsae ne’e lori Timor-Leste gaña medalla ba dahuluk iha kompetisaun desportu SEA Games ba da-33 ne’ebé realiza iha Island Hall, Bangkok, Kuarta (10/12/2025).
Entretantu, atleta modalide Taekwondo husi Timor-Leste ne’ebé partisipa iha SEA Games hamutuk na’in-sia hanesan Devino da Costa, Ana Pinto, Mesias Costa, Cerílio Lein, Domingos Lein, Tey Xena Dias, Dircia Punef, Teresa Lein no Merinda da Costa Soares.
Jornalista: Natalino Belo
Editór: Xisto Freitas da Piedade
