DILI, 18 Dezembru 2025 (TATOLI)–Prezidente Tribunál Rekursu, Afonso Carmona, informa, Tribunál Rekursu daudaun ne’e prepara hela majistradu judisiáriu na’in-13 hodi halo promosaun.
Majistradu judisiáriu na’in-13 ne’e kompostu husi Juíz Embargadór ne’ebé daudaun halo funsaun iha Tribunál Rekursu, ekuantu na’in-sia seluk hanesan juíz sira ne’ebé daudaun halo funsaun iha Tribunál Judisiál Primeira instánsia haat hanesan Dili, Baukau, Suai no Rejiaun Administrativu Espesiál Oekusi Ambenu (RAEOA).
“Ita hahú prepara rekursu agora ba promosaun juíz, agora ita prepara ona Juíz na’in-13 atu halo promosaun. Ha’u labele ko’alia juíz sé sé mak atu halo promosaun, maibé ita agora prepara ona juíz sira ne’ebé atu halo promosaun,” Afonso Carmona hato’o ba Jornalista sira hafoin abertura jogu futbál iha edifísiu Batalaun Orden Públiku, Kaikoli, Kinta ne’e.
Notísia reelvante : Parlamentu sei harii komisaun rekrutamentu ba instalasaun Supremu Tribunál Justisa
Tribunál prepara Juíz Karreira na’in-13 inklui na’in-tolu seluk hanesan ema profizionál ne’ebé iha koñesimentu iha área justisa, bele Advogadu, Defensór Públiku, Prokuradór inklui Dosente Direitu, sira bele hatama aplikasaun iha Komisaun Rekrutamentu hodi halo selesaun ba sira.
“Husi Juíz Karreira na’in-13, Juíz na’in-haat sei priense ba Supremu Tribunál no Juíz na’in-sia sei priese iha Tribunál Rekursu ka Tribunál Segunda Instánsia,” nia akresenta.
Carmona esplika, tuir Lei Organizasaun Judisiária, iha Juíz na’in-tolu ne’ebé mai husi li’ur la’ós Juíz Karreira ne’ebé sei priese mós ba serbisu sira iha Supremu Tribunál Justisa.
“Ita prepara hodi hato’o ba Komisaun Rekrutamentu Juíz mak sei hili sé mak sei ba tuur iha Supremu hanesan Juíz Konselleiru no Tribunál Rekursu. Orsida Komisaun mak hili, kona-ba osan ba instalasaun Supremu Tribunál no rekrutamentu ba Juíz ne’e ita prevee hotu ona tinan oin,” nia subliña.
Daudaun Inspetór ba Juíz sira ne’ebé Tribunál Rekursu rekruta halo hela nia serbisu hodi avalia serbisu Juíz sira nian.
Seluk, Prezidente Tribunál sei foti desizaun ruma kona-ba edifísiu tuan Tribunál Dili ne’ebé sei instala provizóriu Supremu Tribunál.
“Ita la modifika, maibé ita halo reabilitasaun ba fatin ne’e de’it, ita uza bele serbisu ba Supremu nia ne’e ita atu halo ida ne’ebá temporáriu de’it,” nia katak.
Jornalista : Natalino Costa
Editora : Julia Chatarina
