DILI, 12 Dezembru 2025 (TATOLI)-Parlamentu Nasionál (PN) sei harii komisaun rekrutamentu ba instalasaun Supremu Tribunál Justisa, ne’ebé sei envolve órgaun soberania hotu.
Prezidente Komisaun A ne’ebé trata Asuntu Konstitusionál no Justisa, Patrocínio dos Reis Fernandes, hateten Parlamentu harii komisaun rekrutamentu ida hodi haree juis sira ne’ebé prienxe kritériu atu tama iha Supremu Tribunál ne’e.
“Agora, la’o hela iha plenária tuirmai, ita sei eleje membru na’in-rua husi Parlamentu atu serbisu hanesan komisaun instaladora hamutuk ho Prezidénsia Repúblika nia membru ida”, nia informa iha Parlamentu, ohin.
Nune’e, komisaun instaladora halo preparasaun termu referénsia hafoin loke rekrutamentu ida ba júri internasionál sira mak halo selesaun no rekrutamentu ba juis timoroan ne’ebé iha sei prienxe kritériu ho abilidade tuir Tribunál Supremu ne’ebé aas liu iha país ne’e hodi halo serbisu.
“Ita iha espetativa ida iha 2026, hakarak funsionamentu Supremu Tribunál bele la’o ona”, dehan.
Deputadu KHUNTO, António Verdial de Sousa, apoiu inisiativa Governu atu instala Tribunál Supremu hodi fó asesu justisa ba sidadaun ho di’ak liután.
Notísia relevante: https://tatoli.tl/2025/10/15/pr-rona-preparativu-instalasaun-supremu-tribunal-justisa/
Jornalista: Nelson de Sousa
Editora: Maria Auxiliadora
