DILI, 15 Outubru 2025 (TATOLI)-Prezidente Repúblika (PR), José Ramos-Horta, hala’o enkontru ho Prezidente Parlamentu Nasionál, Maria Fernanda Lay, bankada parlamentár, Prezidente Tribunál Rekursu, Afonso Carmona no Ministru Justisa, Sérgio Hornai, hodi rona preprasaun ba instalasaun Supremu Tribunál Justisa.
“Ohin, ami mai ko’alia liga ho instalasaun Tribunál Supremu Justisa. Tanba ne’e iha tinan 2026 ita tenke instala duni, tempu ne’e badak entaun ita hotu esforsu iha 18 Maiu 2026 bele instala,” Afonso Carmona hateten hafoin ramata sorumutu iha Palásiu Prezidensiál Bairru-Pite, kuarta ne’e.
Nune’e Xefe Estadu bolu entidade sira rona entidade idak-idak saida mak bele apoia ba instalasaun ne’e.
“Tanba Konstituisaun mak dehan iha Supremu Tribunál Justisa tanba nee’e tinan 20-resin (seidauk) instala to’o agora,” nia dehan.
Nune’e sorumutu ne’e ko’alia preparasaun husi parte idak-idak nian hodi aselera prosesu instalasaun.
“Enkontru ne’e atu entidade sira fó apoiu, parte Tribunál karik haree lei ruma iha (lakuna) bele hato’o proposta ba Parlamentu Nasionál,” nia salienta.
Tribunál Rekursu rasik daudaun halo hela preparasaun dezeñu ba edifísiu Supremu Tribunál ne’ebé tuir planu atu halo konstrusaun iha Kaikoli no bainhira instala ona provizóriu sei iha uza edifísiu tuan Tribunál Primeira Instánsia Dili, Mandarin.
Nia hateten, ba instalasaun ne’e TR prevee ona iha proposta Orsamentu Jerál Estadu (OJE) 2026 millaun $4 hodi halo reabilitasaun edifísiu referidu, saláriu ba juis, akizisaun viatura, ekipamentu eskritóriu no eletróniku no seluk tan.
Preparasaun seluk mak daudaun juís Inspetór sei halo hala’o inspesaun ba juís sira to’o Dezembru ne’e hatene ona se mak bele koloka iha Supremu Tribunál.
Tuir Konstituisaun RDTL artigu 164 (Kompeténsia Tempu-leet Tribunál Supremu Justisa nian);
1.Bainhira Tribunál Supremu Justisa nian hahú tiha ona nia kna’ar maibé seidauk harii Tribunál hirak ne’ebé temi sai iha artigu 129, Tribunál Supremu Justisa nian ho Tribunál judisiária sira mak sei ka’er kompeténsia ne’e.
2. To’o loron ne’ebé Supremu Tribunál Justisa nian harii no hala’o ona nia kna’ar, Instánsia Judisiál boot liu iha organizasaun judisiál ne’ebé iha Timor-Leste laran maka sei hala’o poder sira-ne’ebé Lei-Inan fó ba Tribunál ne’e.
Notísia relevante: OJE 2026: TR prioriza instalasaun Supremu Tribunál Justisa
Jornalista: Nelson de Sousa
Editór: Evaristo Soares Martins
