DILI, 15 Outubru (TATOLI) – Tribunál Rekursu (TR) iha proposta Orsamentu Jerál Estadu (OJE) 2026 prevee $8,174,725 hodi prioriza instalasaun Supremu Tribunál Justisa, hodi hakbesik justisa ba povu.
“Programa prioridade instala Supremu Tribunál Justisa, presiza alokasaun orsamentu iha saláriu ba juis embarkadór, reabilitasaun infraestrutura, akizisaun viatura tolu, ekipamentu eskritóriu no eletróniku,” Prezidente Tribunál Rekursu, Afonso Carmona, hateten ba jornalista sira hafoin hala’o audénsia públika ba proposta OJE 2026 ho Komisaun A ba Asuntu Konstituisionál no Justisa, iha Parlamentu, kuarta ne’e.
Alende prioriza atividade iha Tribunál Primeira Instánsia sira hodi realiza Tribunál móvel lori justisa hakbesik ba povu no halo divulgasaun lei sira.
Tuir dokumentu livru proposta OJE 2026, TR iha Programa aproxima serbisu Tribunál ba populasaun ho ninia sub-programa lima no atividade lima.
Programa asesu justisa ho sub-programa ida no atividade rua.
Nune’e mós programa funsionamentu no dezenvolvimentu instituisionál ho sub-programa tolu no atividade tolu.
Proposta OJE $8,174,725 hodi aloka ba saláriu bensimentu $5,556,002, bens no serbisu $1,362,723, kapitál menór rihun $790 no kapitál dezenvolvimentu rihun $466.
TR mós relata ezekusaun OJE 2025 ho montante inisiál millaun $4-resin ninia ezekusaun atinji ona 70% no hein katak hela fulan tolu tinan ne’e ramata ezekusaun sei aumenta.
Prezidente Komisaun A, Deputadu Patrocínio dos Reis Fernandes, hateten ohin Komisaun hahú halo audiénsia hodi rona entidade relevante kona-ba proposta OJE 2026 hodi bele hatene programa no atividade saida mak sei halo hafoin diskusaun iha plenária faze jeneralidade.
Deputadu ne’e konsidera nesesita duni instalasaun Supremu Tribunál Justisa ne’ebé prevista ona iha Lei Organizasaun Judisiáriu.
Jornalista: Nelson de Sousa
Editór: Evaristo Soares Martins
