DILI, 27 Dezembru 2025 (TATOLI)–Arsebispu Arkidioseze Metropolitana Dili, Don Virgílio Kardeál do Carmo da Silva, SDB, Sábadu ne’e, inaugura Kapela Estasaun Misionária do Menino Jesus de Praga iha Manleuana, Dili.
Don Virgílio parabeniza sarani sira-nia kontribuisaun no parte hotu hodi harii kapela referida. Ne’e katak ksolok boot duni komunidade Manleuana halibur hamutuk ho sentimentu gratidaun ba domin Na’i Maromak.
“Selebrasaun ohin, hakarak konvida sarani sira hotu atu hametin nafatin fiar iha Maromak ho ezisténsia kapela foun ne’e,” nia hato’o bainhira prezide selebrasaun misa iha kapela ne’e.
Kardeál hateten momentu halibur malu ne’e iha ambiente Natál nian sai momentu furak atu deskobre filafali liafuan domin ninia furak.
“Ho Natál, ita-nia kapela foun fó ba ita momentu ida atubele deskobre filafali oinsá Maromak nia domin mai ita,” Don Virgílio tenim.
Kardeál konvida sarani sira atu kuidadu kapela ne’e hodi haklaken evanjellu.
“Kapela ne’e naran furak, Meninu Jezús. Ida -ne’e fó-hanoin fali ita atu tau nafatin meninu Jezús sai modelu oinsá kuida nafatin ki’ikoan sira,” nia apela.
Iha fatin hanesan, Padre Parókia Motael, Guelhermino da Silva dehan konstrusaun kapela referida gasta orsamentu rihun $233-resin ne’ebé kontribui maihusi sarani sira iha Manleuana rasik no parte seluk.
“Orsamentu ne’e kontribuisaun husi sarani sira kuaze rihun $193, sosiedade sivíl rihun $15, Vatikanu rihun $65 no Parókia Santu António Motael rasik mós apoiu orsamentu ba konstrusaun ne’e to’o ramata,” nia relata.
Pároku apela ba sarani sira atu utiliza kapela referida ho kuidadu no bá-oin tenke funsiona liuhusi uza forma vida espirituál no morál atu hakbesik aan liután hodi hadi’a relasaun ho Na’i Maromak rasik.
Aleinde ne’e, Konsellu ba Komisaun Organizadora, José Pedro dos Santos, hateten prosesu harii kapela ne’e iha tinan lima liubá no kapela antes ne’e ki’ikoan maibé iha sarani barak husi aldeia lima.
Prosesu konstrusaun ne’e la’o iha tempu naruk iha-ne’ebé kontribui husi parte hotu to’o konsege finaliza.
Jornalista: Nelson de Sousa
Editór: Xisto Freitas da Piedade
