VIKEKE, 01 Janeiru 2026 (TATOLI)–Komandante Polísia Nasionál Timor-Leste (PNTL) Eskuadra Postu Uatulari, Inspetór Polísia Francisco Fernandes Menezes, informa iha ámbitu simu tinan foun 2026, akontese konfrontu entre joven Aldeia Tatilari no Aldeia Uatulo husi Suku Matahoi, Postu Administrativu Uatulari, Munisípiu Vikeke, iha-ne’ebé PNTL Uatulari konsege kaptura suspeitu hamutuk na’in-14 hodi submente ba prosesu invetigasaun.
“Horikalan despede tinan tuan no simu tinan foun, mosu konfrontu entre joven sira. Ami bá halo atuasaun konsege kaptura joven na’in-14. Husi kazu konfrontu ne’e, ninia prosesu investigasaun ita lori suspeitu sira bá iha Komandu PNTL Munisípiu Vikeke hodi halo prosesu investigasaun. Depoizde prosesu investigasaun ramata, sei kontinua lori bá Ministériu Públiku,” Francisco Fernandes ba TATOLI iha Postu Uatulari, Kinta ne’e.
Komandante PNTL Eskuadra Uatulari ne’e haktuir kronolojia ba konfrontu ne’e mak joven sira konsume alkol, sunu fogete no kondús motorizada halo barullu.
“Husi parte rua ne’e hemu tua lanu hotu depoiz sunu fogete se fali ba malu, depoiz kaer fatuk lori tuda malu tan. Entaun, Polísia Eskuadra Uatulari ba atua ho karreta patrullamentu. Suspeitu sira husi parte Tatilari nian tuda lisuk fali karreta polísia nian ne’ebé vidru odamatan kotuk parte husi liman-loos nian rahun no membru polísia na’in haat (4) mak hetan tuda no sai kanek,” nia relata.
Nune’e, nia dehan, konfrontu referidu afeta mós komunidade nia uma rua ninia kalén kuak no sasán uma laran hanesan armáriu no vidru rahun hotu. Kazu konfrontu ne’e rejistadu ho tipu ofensa simples no danu.
Kazu ne’e, Francisco informa, suspeitu husi Aldeia Tatilari na’in-hitu (7) no suspeitu husi Aldeia Uatulo na’in-hitu (7) ne’ebé daudaun ne’e iha ona Komandu PNTL Vikeke.
Aleinde ne’e, Francisco hateten, iha mós konfrontu iha Suku Afaloikai entre joven sira husi Aldeia Ossokaiua, Uaikai no Dasu-Uati, kauza husi konsume alkol no sunu fogete mak rezulta joven baku malu no tuda malu, rezulta komunidade nia uma rua hetan tuda.
“Konfrontu iha Suku Afaloikai ami kaptura ona suspeitu hamutuk na’in-haat (4), na’in-ida husi Aldeia Dasu-Uati, Uaikai iha na’in-ida no Ossokaiua na’in-rua. Suspeitu sira daudaun ne’e iha ona Eskuadra Polísia Uatulari hodi submete ba prosesu investigasaun. Kazu ne’e ita rejistadu ho tipu ofensa simples,” nia esplika.
Jornalista: Vitorino Lopes da Costa
Editór: Xisto Freitas da Piedade
