DILI, 29 Dezembru 2025 (TATOLI)—Polísia Nasionál Timor-Leste (PNTL) detein ona joven hamutuk 20-resin durante selebrasaun Natál.
“Komandu Munisípiu Dili durante iha Natál kaptura ita-nia joven sira ne’ebé mak konsumu alkól nomós balun ne’ebé halo konflitu ita halo prevensaun ita kaptura ema 20-resin,” Komandante PNTL Munisípiu Dili, Superintendente Xefe Polísia Orlando Gomes, informa ba Jornalista iha Sentru Konvensaun Dili (CCD, sigla portugés), Segunda ne’e.
Nia dehan, Autoridade Seguransa detein joven hirak ne’e durante oras 12 nia laran no halo identifikasaun tanba konsumu tua iha bairru hodi halo konflitu.
“Kuandu ita halo identifikasaun iha provas katak balun envolve duni iha krime ita rekomenda ba oras 72 atu kontinua ba prosesu investigasaun,” nia akresenta.
Notísia relevante : PNTL detein joven na’in-lima iha Baucau
Iha parte seluk, ekipa Forsa Tarefa Konjunta kontinua halo prevensaun ba konflitu iha Misa Natál loron 24 Dezembru.
Nia esplika, membru Polísia kolokadu iha terrenu hodi halo patrullamentu la’o ain hamutuk ho Forsa Tarefa Konjunta, Forsa Defeza, Polísia Militár, Forsa Espesiál no Unidade Espesiál Polísia hamutuk ho Servisu Sekretu sira hodi kontrola situasaun seguransa iha kapitál Dili.
“Durante Festa Natál iha loron 24, ita nafatin esforsu kontrola ita-nia bairru sira, ita nafatin halo atuasaun maka’as hodi halo prevensaun. Iha momentu ne’ebá mós iha kazu krime iha violénsia doméstika ne’ebé mak akontese iha mós joven sira konsumu alkól,” Komandante Polísia haktuir.
Momentu ne’ebá, joven konsumu alkól no mosu konflitu entre bairru laran hanesan iha Suku Madohi no Tuana-laran maibé ekipa Forsa Tarefa Konjunta halo kedan atuasaun.
Nune’e mós, PNTL rejista asidente fatál durante Misa Natál, ne’ebé motór ida soke karreta iha área Hudi-laran hodi rezulta pasajeiru ida mate tanba ran sai maka’as iha inus, la konsege salva nune’e ikus mai hakotu iis iha fatun akontesimentu.
Jornalista : Natalino Costa
Editora : Julia Chatarina
