DILI, 31 Dezembru 2025 (TATOLI)—Ministru Asuntu Kombatente Libertasaun Nasionál, Gil da Costa Monteiro ‘Oan Soru’ husu ba sidadaun sira atu valoriza loron eroi nasionál.
“Kuandu dehan simu veteranu, ita la presiza fó konvite sira mai de’it. Mas loron ida sira-nia inan, sira-nia aman, sira-nia avo mate ne’e sira la hatene valoriza. Tanba ne’e, hanesan Ministru hakarak apela ba sidadaun hotu espesialmente ba veteranu sira, labele tau osan a’as liu duké istória ne’ebé lori sira-nia inan-aman, avo hodi sai husi nakukun,” Ministru Oan Soru hato’o ba Jornalista sira hafoin partisipa iha serimónia komemorasaun loron eroi nasionál ne’ebé hala’o iha estátua Rotunda Nicolau Lobato, Komoro, Kuarta ne’e.
Notísia relevante : MACLN konsulta ho PR Lú-Olo kona-ba selebrasaun loron eroi nasionál
Tuir governante ne’e, sasán hotu bele lori osan mak sosa maibé istória pasajen memória nia moruk ne’e lori inan-aman nia kosar no mataben mak bele sosa.
“Tanba ne’e, husu ba sira hothotu mai partisipa eventu sira ne’e hodi valoriza istória ne’ebé labele repete tan ona,” nia akresenta.
Ministériu Asuntu Kombatente no Libertasaun Nasionál (MAKLN) iha tinan ne’e organiza eventu komemorasaun loron eroi nasionál.
Komemorasaun ne’e hahú ho misa agradesimentu ne’ebé hala’o iha Metinaru no ohin halo serimónia iha estátua Rotunda Nicolau Lobato.
“Ba ohin ha’u husu ba inan-aman sira atu partisipa eventu sira hanesan ne’e hodi hamutuk valoriza sira ne’ebé ohin la hamutuk ho ita,” nia fó hanoin.
Jornalista : Natalino Costa
Editora : Julia Chatarina
