DILI, 31 Dezembru 2025 (TATOLI)—Prezidente Repúblika (PR), José Ramos-Horta fó onra no omenajen ba eroi sira iha ámbitu komemorasaun loron eroi nasionál.
“Ha’u hakruuk ba arkitetu autores ita-nia independénsia, ba sira hothotu. Uluk liu ba sira ne’ebé veteranu frente armada, ba sira ne’ebé lakon sira-nia vida iha rai doben ida-ne’e simu sira. Ha’u hakruuk ba mane no feto sira frente armada, frente ne’e ditadu labele sees husi frente rua seluk, frente armada no frente esterna,” Prezidente Ramos-Horta hato’o deskursu iha ámbitu komemorasaun loron eroi nasionál, ne’ebé realiza iha rotunda estátua Nicolau Lobato, Komoro, Kuarta ne’e.
Notísia relevante : Governu sei komemora loron eroi ho tema ‘Ami-nia mate sai inspirasaun ba povu’
Xefe Estadu mós fó respeitu ba fundadór nasaun no líder sira ne’ebé laiha hotu ona hanesan Saudozu Francisco Xavier Amaral, Nicolau Lobato, Mário Carrascalão, Fernando Lasama de Araújo no sira ne’ebé iha hela hanesan Kay Rala Xanana Gusmão, Taur Matan Ruak, Francisco Guterres Lú-Olo, Marí Alkatiri, Roqui Rodrigues, José Luís Guterres, Abilio Araújo inklui Mariano Assanami.
“Ha’u hakruuk ba ita-nia Igreja, ha’u hakruuk ba Dom Martinho Lopes, ba Dom Carlos Ximenes Belo, Padre Domingos Maubere no konfisoes relijiozu hotu, ba sira hothotu ne’ebé naran ha’u la temi ha’u hakruuk ba sira, sira mak eroi duni,” nia akresenta.
Prezidente Repúblika kompromete sei buka halo di’ak liután iha tinan 2026.
“Ha’u sei tenta halo kooperasaun institusionál iha Governu, Parlamentu, Tribunál, Partidu Polítiku no dirijente hodi sira halo diálogu ho fraternu,” PR katak.
Horta simu krítika sira durante ne’e hodi haforsa serbisu sira sai hanesan servidór ne’ebé di’ak.
“Ha’u agradese krítika no ha’u sei hateten krítika justa. Ha’u sei hateten krítika ne’e ita sei rejista, ita estuda tanba krítika sei halo ita sai di’ak liután sai ema servidór ne’ebé di’ak liu, servidór povu ho di’ak liu,” nia tenik.
Xefe Estadu mós sei hametin liután relasaun internasionál.
“Ha’u sei buka hametin liután ita-nia relasaun internasionál ho país viziñu sira, parseiru dezenvolvimentu liliu membru sira ASEAN, CPLP no grupu pás sira no kontribui maka’as liu ba resforsu multi kooperasaun,” nia hato’o.
Horta promete sei hametin kooperasaun provínsia ne’ebé besik Timor-Leste, hanesan Timor Osidentál hodi asegura liña fronteira terrestre no marrítima.
Jornalista : Natalino Costa
Editora : Julia Chatarina
