VIKEKE, 31 Dezembru 2025 (TATOLI)–Pe. Cimpliu Bou Mali, SVD, hateten tinan 2025 ne’ebé daudaun sai ona memória ba jornada moris nian no tinan 2026 sai hanesan esperansa foun.
“Ita haksolok simu ho dame hodi despede tinan 2025 tanba Maromak sempre akompaña ita ho nia maneira rasik. Ohin ita ho neon ida, ita hasa’e misa agradesimentu ho orasaun ne’ebé kle’an ba Maromak tanba buat hotu ne’ebé akontese ona iha tinan 2025. Ita hato’o agradese no obrigadu buat sira-ne’ebé akontese ona. Husik akontese hodi sai memória ida ba ita iha jornada moris nian. Ita hakat bá tinan 2026 ho esperansa foun,” Pe. Cimpliu Bou Mali dehan iha nia omília bainhira prezide misa agradesimentu hodi despede tinan tuan no simu tinan foun iha Igreja Parókia Nossa Senhora de Fátima Uatulari, Kuarta kalan.
Amu ne’e subliña memória ida-ne’ebé sei la akontese filafali nune’e sarani sira hakerek kona-ba buat sira-ne’ebé ultrapasa ona hodi sai sasin ba sirkulasaun tempu durante tinan 2025 nian laran.
“Iha ema balun iha tinan 2025 sai hanesan tempu ne’ebé nakonu ho susar, terus no sira hanoin hakarak husik lalais tinan ne’e tanba parte ida terus no susar. Balun lakon ema sira-ne’ebé sira hadomi liu. Nune’e, ba sarani sira, tempu ne’ebé Maromak haraik mai ita, atu ita bele hadomi malu sai ajente ba moris kualidade,” nia haklaken.
Tan ne’e, Amu Cimpliu solisita sarani sira halo reflesaun ba esperiénsia tanba buat hotu ho nia tempu nune’e Maromak fó hanoin atu fiar metin ba Maromak no serbí Maromak.
Tuir observasaun jornalista TATOLI nota katak iha selebrasaun misa simu tinan foun 2026 iha Igreja Nossa Senhora de Fátima Uatulari la’o hakmatek tanba hetan seguransa másima husi Polísia Nasionál Timo-Leste (PNTL) Eskuadra Postu Administrativu Uatulari.
Entretantu, partisipa iha misa selebrasaun ba tinan 2026 ne’e kompostu husi autoridade lokál, veteranu no sarani sira.
Jornalista: Vitorino Lopes da Costa
Editór: Xisto Freitas da Piedade
