DILI, 08 Janeiru 2026 (TATOLI)-Deputadu husi Partidu Kmanek Haburas Unidade Timoroan (KHUNTO), António Verdial de Sousa, husu ba Ministériu Edukasaun (ME) atu rezolve problema falta profesór iha eskola balun, nune’e bele fó prosesu ensinu aprendizajen ba alunu sira.
Tuir kontaktu eleitorál iha baze, manorin-na’in sira ne’ebé foin lalais reforma ona afeta ba eskola balun falta profesor, tanba ne’e presiza tau atensaun urjente.
Deputadu ne’e apoia polítika Governu hodi halo reforma obrigatória ba profesór sira, maibé presiza iha polítika di’ak hodi halo kolokasaun antes, nune’e labele fó impaktu ba prosesu ensinu aprendizajen.
Deputadu ne’e apresia Ezekutivu ne’ebé antes ne’e halo ona rekrutamentu ba manorin sira liuhusi bolsa kandidatu no ba oin kontinua halo rekrutamentu hodi koloka bá eskola balun ne’ebé falta manorin-na’in.
Deputada husi Partidu Kongresu Nasionál Rekonstrusaun Timorense (CNRT), Cedelízia Faria dos Santos, dehan manorin-na’in sira ne’ebé reforma ona ne’e sei fó impaktu, maibé iha tinan kotuk Ministériu Edukasaun halo ona rekrutamentu foun hodi destaka iha eskola sira iha territóriu.
Tanba ne’e, espera ministériu bele identifika no halo ona mapeamentu ba eskola sira hodi koloka fali profesór sira.
Lembra katak, iha 18 Dezembru 2025, Komisaun Funsaun Públika (KFP) atribui sertifikadu apresiasaun ba funsionáriu públiku na’in-1.985 ne’ebé tama reforma iha tinan 2026. Husi númeru ne’e iha na’in-1.305 mak manorin-na’in.
Notísia relevante: Funsionáriu reformadu na’in-1.985 simu sertifikadu apresiasaun
Jornalista: Nelson de Sousa
Editora: Maria Auxiliadora
