DILI, 18 Dezembru 2025 (TATOLI)-Komisaun Funsaun Públika (KFP) distribui sertifikadu apresiasaun ba funsionáriu públiku na’in-1.985 ne’ebé sei reforma iha tinan 2026.
Prezidente KFP, Agostinho Letêncio de Deus, hateten iha serimónia ne’ebé hala’o iha salaun Timor Klaran, munisípiu Aileu, katak primeira vez realiza atividade iha konstrusaun Estadu no iha prosesu dezenvolvimentu administrasaun públika Timor-Leste.
“Serimónia ne’e fó ita-nia rekoñesimentu profunda no dignu ba funsionáriu hamutuk 1.985. Entre sira-ne’e, maioria husi profesór sira ne’ebé serví ba Estadu Timor-Leste ho sira-nia dedikasaun tomak, espíritu, no serbisu durante tinan barak. Rekoñesimentu ne’e fó liuhusi Primeiru-Ministru ninia asinatura iha sertifikadu, ne’ebé reprezenta rekoñesimentu Estadu tomak nian”, nia hato’o liuhusi komunikadu ne’ebé Tatoli asesu, ohin.
Iha intervensaun, Ministra Edukasaun, Dulce de Jesus, hateten funsionáriu públiku ne’ebé tama ona ba reforma obrigatória, sira sakrifika-an barak, liuliu profesór sira ne’ebé hamriik hanorin durante tempu portugés, tempu okupasaun, to’o Timor ukun rasik-an. “Ita-boot sira kontribui ba dezenvolvimentu ita-nia Estadu ida-ne’e”, dehan.
Governante ne’e kongratula espesiál ba manorin-na’in sira ne’ebé sai nu’udar erói ba nasaun ida-ne’e, hamutuk ema 1.305.
“Husi ita-boot sira-nia kolen, agora tama ba faze foun moris nian, ne’ebé integra hikas ba família hodi hahú aventura foun lahó serbisu”, nia hato’o.
Serimónia ne’e atu fó onra boot ba erói sira ne’ebé durante ne’e fó an ba administrasaun públika Timor-Leste. Sertifikadu ne’e hanesan memória no evidénsia ba Estadu ida-ne’e. Maski tinan oin kadeira iha eskola no eskritóriu sira sei mamuk.
“Imi-nia prezensa sei la lakon, imi-nia lian sei hananu nafatin iha estudante sira-nia hanoin, no imi-nia matadalan sei sai naroman ba futuru. Imi-nia lalatak sei sai motivasaun ne’ebé kuda hela iha estudante sira-nia memória no sei rona nafatin iha sira-nia moris tomak”, nia hato’o.
Hodi konsidera sira nu’udar profesór di’ak ida, nunka reforma iha estudante sira-nia fuan, maibé sai susesu ba estudante sira iha futuru ne’ebé di’ak.
Prezidente Komisaun A ne’ebé trata Asuntu Konstitusionál no Justisa iha Parlamentu Nasionál, Patrocínio Fernandes dos Reis, fó omenajen ba funsionáriu reformadu sira iha konstrusaun Estadu ne’ebé uluk luta hodi harii administrasaun públika no saúda esforsu no dedikasaun funsionáriu sira-nian.
“Administrasaun públika eziste tanba ita-boot sira-nia esforsu no kontribuisaun ba Estadu. Tempu marka ona serbisu ne’ebé hala’o, maibé agora importante mak atu hato’o fali ba jerasaun foun sira hodi iha espíritu serbisu ho dedikasaun no garante persisténsia”, hateten.
Komisaun hato’o apresiasaun boot no parabeniza serbisu KFP ho ninia funsionáriu sira ne’ebé serví ho di’ak ba mákina Estadu nian.
Reprezentante Primeiru-Ministru, liuhusi Vise-Ministru Asuntu Parlamentár, Adérito Hugo, dehan eventu istóriku ida-ne’e partisipa husi funsionáriu sénior sira, hanesan kontinuasaun ba reforma funsionalizmu públiku. Polítika nasionál Governu Dasiak dezeña ho di’ak tebes ba dinámika prosesu administrasaun públika Timor-Leste nian. “Susesu Timor-Leste iha pós-independénsia sura mós ho kontribuisaun husi ita-boot sira”.
Nia hateten katak Governu foti pasu ida-ne’e nu’udar parte husi orientasaun Primeiru-Ministru nian ba KFP ho objetivu prinsipál mak atu hadi’a mobilizasaun no garante katak administrasaun públika la’o sees husi influénsia polítika partidária.
“Tema despolitizasaun administrasaun públika ne’e todan, ne’e hanesan ‘trabalho de casa’ boot ida ba ita hotu. Governu Dasiak kompromete ona katak administrasaun públika la’ós fatin ba politizasaun”, nia afirma.
Vise-Ministru hatutan katak antes halo reforma ba funsionáriu sira, Governu prepara ona jerasaun foun timoroan sira hodi foti fali knaar nu’udar servidór Estadu nian, nune’e la’ós de’it atu hametin, maibé mós halo renovasaun ba kualidade servisu.
Governu garante katak maski sira reforma ona, sira sei kontinua simu pagamentu husi seguransa sosiál. Governu sei nafatin hadi’a sistema ne’e hodi asegura katak kontribuisaun ne’ebé sira fó ona durante tinan barak sei fó fali benefísiu ne’ebé dignu.
Serimónia ne’e partisipa mós husi Prezidente Autoridade munisípiu 13, inklui RAEOA.
TATOLI
