DÍLI, 18 Maiu 2026 (TATOLI) – Prezidente Autoridade Munisípiu Díli (PAM Díli), Francisco dos Santos, husu povu Timor-Leste, liuliu komunidade iha Munisípiu Díli, atu hametin unidade no estabilidade hodi fó kontribuisaun ba dezenvolvimentu nasionál.
Francisco hato’o mensajen ne’e iha kontestu selebrasaun restaurasaun independénsia ba dala-24.
Iha nia mensajen, Francisco dos Santos hateten katak unidade no estabilidade mak xave importante atu povu bele partisipa ativamente iha prosesu dezenvolvimentu nasaun nian.
“Ita hotu-hotu tenke hametin unidade no estabilidade atu bele fó kontribuisaun ba dezenvolvimentu nasionál,” dehan Francisco.
Nia husu ba sidadaun hotu-hotu presiza hala’o nia funsaun ho responsabilidade atu fornese servisu di’ak no satisfasaun ba komunidade, liuliu ba sira-ne’ebé presiza tulun.
“Juventude tenke esforsu buka koñesimentu no aprende buat barak atu prepara-an ba futuru nasaun nian,” Francisco ba jornalista TATOLI iha edifísiu PAM Díli, ohin.
Nia enfatiza katak juventude sira presiza aprende husi lider nasionál sira-nia esperiénsia atu iha futuru bele kontinua lidera Timor-Leste.
“Joventude tenke aprende barak husi ita-nia lider nasionál sira, atu bainhira sira la iha ona, jerasaun foun prontu ona atu kontinua dezenvolve no lidera nasaun ida-ne’e,” nia hateten.
Francisco mos husu ba komunidade iha Munisípiu Díli atu iha sentimentu na’in no responsabilidade ba dezenvolvimentu kapital nian, tuir vizaun ‘Hamurak Díli’ ne’ebé PAM promove.
“Munisípiu Díli nia mehi mak halo sidade Díli sai furak no organizadu iha ema hotu-hotu nia matan. Tanba ne’e, ita tenke servisu hamutuk, fó kontribuisaun ba malu no haree malu hanesan família ida deit,” nia konklui.
Jornalista: Camilio de Sousa
Editór: Filomeno Martins
