DILI, 13 Maiu 2026 (TATOLI) – Sekretaria Estadu Kooperativa (SEKoop) kolleta ona Bafo Kayrala tonelada 60 iha époka dahuluk tinan ne’e.
Diretór Nasionál Higino Barros, hateten SEKoop planeia iha tinan ne’e sei kuda Bafo Kayrala iha terenu ektare189, iha munisípiu 12 inklui Oekusi.
“Husi númeru ne’e, iha époka dahuluk nian kuda uluk ona iha ektare 80-resin, no sira ne’ebé kolleta ona hamutuk tonelada 60”, Higino Barros hateten ba Tatoli, iha Akait-Dili, ohin.
Nia hateten produsaun Bafo Kayrala iha tinan ne’e la’o di’ak, tanba udan-been susfisiente no iha Maiu ne’e sei kontinua kuda tan, nune’e bele atijne alvu ektare 189 ektare.
Iha tinan ne’e, SEKoope esforsu kuda to’o alvu ne’ebé iha, tanba daudaun iha ona Kooperativa, Korenti, Karidade iha Timor (3K-T) ne’ebé asina ona akordu ho SEKoop atu sosa tonelada 120 iha kada tinan no empreza Heineken sei sosa atu halo produsaun ba tua ka serveja ne’ebé tuir planu sei halo lansamentu iha fulan-Outubru tinan ne’e.
“Heineken ne’e foin atu koko, entaun sira planu sosa uluk 20 tonelada, maibé sira prodús tiha ba serveja demanda ba merkadu barak ona hanoin sira sosa sei liu kuantidade ne’ebé kada époka kolleta ne’e”, nia dehan.
Tuir nia, antes ne’e produtór sira barak mak hakarak kuda, maibé sira-nia lamentasaun mak merkadu laiha, maibé daudaun merkadu iha ona mo ba oin sei halo sosializasaun di’ak ba agrikultór sira nune’e sira bele kuda barak.
Lembra katak, iha tinan kotuk, SEkoop kolleta Bafo Kayrala hamutuk tonelada 88 husi kultivu iha rai ektare 44, iha munisípiu Lautein, Likisá, Manatutu, Bobonaru, no Oekusi.
Jornalista: Arminda Fonseca
Editora: Maria Auxiliadora
